MZP-in exam buatsaih leh thuai turin sawrkar ngên

MZP chuan Right To Education Act hman a nih tak avanga SSA zirtirtu tur lak te tan bika Teachers’ Eligibility Test (TET) exam leh kumina VRS scheme a zirtirtu chhuak te aiawh 169 tur lak tum ṭhulh tak chu a rang thei ang bera ruahmanna awmsa anga exam buatsaih leh turin sawrkar a ngen.

Inrinnia MZP Gen. Hqrs. executive meeting chuan zirtirtu indaihlohna a nasat avang leh SSA hnuaia zirtirtu 716 te chu TET an exam loh avanga ban theih an nih avangin, zirtirtu indaihlohna nasa tak a thlen loh na’n a rang thei ang bera Sawrkarin ruahmanna a lo siam tawh sa zulzuiin Exam hi buatsaih ni thei se an duh thu an sawi a. Hemi chungchang hi MZP chuan PRESTA leh SSA Employees Association Mizoram hruaitute pawh sawipuiin MZP ngahdan chu ṭha an tih thu an sawi niin an thuchhuah chuan a tarlang.

MZP thuchhuah chuan hun rei tak ata tawh zirtirtu indaihlohna sutkian a nih theih nan zirtirtu post ruak hnawhkhat turin sorkar thuneitute a lo ngen tawh thin niin an sawi a. Mahse sorkarin pawisa a neih loh avanga duh anga thil a kalpui theih loh avangin vawiin thlengin school hrang hrang, a bikin thingtlang lam school-ah zirtirtu indaihlohna a nasa hle tih an tarlang a. Chumi chhawk zangkhai na’na VRS a chhuak te aiawh tur zirtirtu 169 zet lak an ni tur awm laia tiam chin awmlo a zirtiru lak hna thulh lailawk a ni ta chu MZP chuan pawi a ti tak zet a a ni an ti a. Zirlaite’n zirtirtu an mamawhna a nasat tawh em avangin state sawrkar-in ruahmanna a kalpui tawh sa anga a rang thei ang bera VRS a chhuak te hnawhkhah na’na zirtirtu 169 lak hna chu rang taka kalpui turin leh, SSA zirtirtu 716 zet te tana TET exam pawh a rang thei ang bera buatsaih turin MZP chuan sorkar chu a ngenin a phut tak meuh tih an thuchhuah chuan a sawi a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram