MZP chuan Mizoram Scholarship Board in dan thar siama Scholarship diltu zirlai zawng zawngte hnena residential certificate thar kher thehlut tura an ti chu ṭha a ti lo tih nimin khan thuchhuah siamin a sawi a, hei hian zirlaite tan harsatna nasa tak a siam sak a, residential certificate an neih sa chu scholarship an dilna a hman chhun-zawm phalsak ni se an ti.

Scholarship dilna a thil tel thin Tribal Certificate leh Residential Certificate chu vawi khat lakchhuah anih tawh chuan a tulna apianga hman chhunzawm theih anih avang leh, dan pawhin kumtin a thar kher lakchhuah a phut loh avangin zirlaiten an awmna hmun an sawn lo anih chuan Residential Certificate  an neih sa chu a tul apianga hman phalsak turin thuneitute a ngen tih an thuchhuahah chuan an sawi. MZP chuan NEC hnuaia kum 2012-2013 academic session-a Stipend leh Book Grant vawiin thlenga semchhuah a la ni lo chu pawi a ti tih sawiin, a rang thei ang bera semchhuah anih theih nana hma la turin MZP chuan sorkar a ngen a. Kum 2012-2013 atana kumin kumtir lama central sorkarin pawisa a pekchhuah fel vek tawh si, vawiin thlenga zirlai mamawhtu te hnena pekchhuah a la ni  lo fo chu MZP chuan hriatthiam harsa a ti tih a sawi bawk.