NLUP 2na & 3rd phase leh Supplementary List (4th phase) hnuaia beneficiary-te thlannaah NLUP Manual Bung III-a Guideline bawh-chhia-a chhungkaw pakhata mi pakhat bak thlang te, nupui/pasal/fate – chhung-kuaa sawrkar hnathawk awm te thlan an awm niin NLUP Implementing Board chuan a hria a. Hetianga dik lo taka thlante zawng zawng hi NLUP Implementing Board chuan cancel vek tur tiin thutlukna a siam a. Chuvangin NLUP 2nd & 3rd phase leh Supplementary List (4th phase)-a mite ennawn leh turin Deputy Commissioner (Bawrhsap) zawng zawng thupek an ni tawh tih nimina sawrkar thuchhuah chuan a tarlang.
Khaw tina NLUP Implementing Committee leh NLUP Monitoring Committee member-te leh mi tupawhin hetiang thil dik lo hria an awm chuan mahni District Deputy Commissioner (Bawrhsap) Office-ah ṭheuh June 21, 2013 aia tlai lova report tura hriattir an ni a. Hun tiam chhunga complaint thehlut lo chuan a hnuah thehlut mahse la awmzia a nei tawh lovang tih sawrkar thuchhuah chuan a tarlang bawk.