Mizoram News

NLUP anga mipui rilrem leh hriat hlawh la awm lo ti

NLUP Apex Board meeting vawi 12-na chu Chairman Pu Lal Thanhawla, Chief Minister kaihruainain nimin khan Aizawl-a NLUP Implementing Board (NIB) conference-ah neih a ni a, Chief Minister Pu Lal Thanhawla chuan India ramin zalenna a neih hnu ah NLUP ang renga mitin hriat hlawh leh a nawlpuia mipui ril rem hmasawnna programme hi a la awm ngai lo, a ti a, hetiang taka sawrkar leh loneitute inkara inpawhna leh thawhhona ṭha pawh hi a la awm ngai lo, a ti bawk.

Chief Minister chuan Chalfilh biala MLA bye-election leh Chakma Autonomous District Council result te chuan loneituten NLUP ṭha an tihzia a tichiang hle a ni, a ti a.University of Minnesota, USA aṭanga mithiam rual Mizoram rawn tlawhtu ten district 5 a khaw 14 an tlawh chhuah aṭangin Mizoram sawrkar-in NLUP a kalpui chu tunlai khawvelin ei leh bar, sik leh sa, tui, boruak leh leilung chhe mek siam ṭhatna tura mamawh chhânna niin an hria a, an phurpui hle a ni, a ti a. Kumin January 28 a Scientists rual ten India International Centre-a Interactive Session an neihah pawh NLUP chu India rama hmasawnna programme duan chhuah leh kalpui tawh a zawnga danglam ber an ti a, khawvel pum huapa mithiam rual kal khawmte chuan mirethei te kuta sum luhna tur te, ram leilung hmanna dan siam ṭhatna tur te, tui hna enkawlna leh mirethei te chawikanna tur zawng zawng te chu NLUP chuan a fun kim vek a ni, an ti, a ti bawk a.

NLUP kalpui tawh china hmasawnna langsar zualte tarlangin hmunphiah avangin loneitu tam tak kum khat sum lakluh chu a let 4 leh let 5 ten a pung a ni, a ti a. NLUP sum hmanga department thuam ṭhat avangin Sericulture department chuan loneitute pangngang chi mamawh zaa 60 lai a tum thei tawh a; hetiang bawk hian department dang Fishery, Soil & Water Conservation, Horticulture leh AH&Vety te pawh kum hnih khatah chuan sangha, ran leh thlai chi ah intodelh tura beisei an ni, a ti.

NLUP sum hmangin loneitute feh kawng tam tak sial a ni tawh tih sawiin Chief Minister chuan kum 2012-13 chhung ngawt pawhin NLUP kawng km 400 a thui sial nan cheng vaibelchhe 39 pek chhuah a ni, a ti a. Nikum lama bawng hrileng vanga an bawng chân te pawh pek an ni leh tawh a, Serchhip, Champhai leh Kolasib-ah te Milk Processing Centre sak a nih bakah Aizawl-a bawnghnute sawngbawlna MULCO chu thuam chak a ni, a ti bawk.

Nimin meeting-ah hian Mamit district-a National Highway siam mekah contractor leivung paihin NLUP hnuaia sangha dil a tihchhiat report a ni a, hemi chungchang hi Chief Minister chuan a changtu PWD hotute hnenah enfiah vat tur leh contractor chu dan anga hna thawk a, a thil tihchhiat man zângnadawmna pe tura hriattir turin a ti nghal a ni.

NLUP Apex Board meeting-ah hian National Rainfed Area Authority CEO Dr. JS Samra chuan thingtlang khaw 11 a tlawh aṭanga NLUP hmalakna a hmuh dan leh rawtna a neih te a tarlang a. District tin aṭangin DC te leh NLUP line department 9 ten an hmalakna kawnga an hmasawnna leh harsatna neih te tarlangin presentation an nei ṭheuh bawk a. NLUP kal-phungah siam ṭhat leh thlak danglam ngaite thlir hovin member ten rawtna an neihte nen zau taka sawihona neih a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram