Serlui ‘B’ Hydel Project chu a enkawltu leh thuneitu mumal awmlo nia hriain, a enkawltu bik mumal tak siam a nih theih nan YMA Sub Hqrs. Kolasib chuan hmalak a tum.
Kolasib Sub-Hqrs YMA Executive meeting chuan Mizoram rohlu Serlui B Hydel Project ah hian Mizoram sawrkar hnuaia Department hrang hrangte chuan anmahni remhriatna angin an duh leh ṭha an tih angin mahni zawn ṭheuhah hma an la mai niin an sawi a, Hetianga thuneitu bik leh enkawltu mumal awmlo anga dah a ni chu hun lo la kal leh zel tur atan ṭha lova hriain, a enkawltu bik mumal tak siam tura Sawrkar ah thlen nise an ti a ni.
Serlui ‘B’ Hydel Project hi Power & Electricity Deptt. enkawl nia ngaih theih a nih laiin, tui-khuah kam leh a chhehvel ram a thing leh mau te chu Environ-ment & Forest Deptt te chuan neitu chan chang in an ‘mahal’ mek niin Sub Hqs YMA chuan an sawi a, tuikhuahah hian Fisher-ies Deptt. chuan sangha chi chhuahin sanghate hi ‘mahal’-in sumdawng ten anmahni remchan angin an man thin bawk a, Heng bakah hian tuikhuah kam velah hian Tourism Deptt chuan khualzin chawlhbukte sain hma an la ve mek bawk a ni.