Ramri chungchanga thil awmdan ngaihven hun tak meuh tih sawi

India News

Nimin khan All Mizoram Fermers Union (AMFU) Gen. Secretary Zion Lalremruata chuan AMFU Office-ah chanchinthar lakhawmtu ṭhenkhatte thingpui inpuiah sawmin, ramri hrula Mizoram mi leilet neite chu an ramah State dang ten kawngpui siama hma an lâk mek avangin, ramri chungchanga thil awm dan chu ngaihven a hun tak meuh tih a sawi.

AMFU hotute chuan Assam ramria K.Hlimlawma leilet tawp thleng – chhungkaw dang 13 te leilet telin Assam sawrkar chuan kawngpui a sial tawh tih an sawi a, hetiang a nih avang hian Mizoram sawrkar chuan ramri chungchangah hmalatu tur Department bik awm se ṭha an tih thu an sawi a, Assam lam hian ramri chungchangah Minister Portfolio hial neia hmala tur an ruat bik avangin an dep ramri hrul tinah hma an la a, hemi chungchangah hian Mizoram lam pawhin ngaihven chian a ṭul thu an sawi a ni.

AMFU hotute chuan kumin May ni 30-a North East Farmers’ Fedaretion (NEFF) meeting CBC NEI Conference Hall, Paan Bajar, Guwahati-a an neih chungchang pawh sawiin, NEFF chu India hmarchhaka loneitute harsatna tawh hrang hrangte sutkian dan ngaihtuahtu, a bikin thlaithar hralhna chungchanga harsatna awm ṭhinte a huhova sutkian dan tur ngaihtuah tura din a ni tih an sawi a. He pawl hi December ni 5, 2012 khan AIzawl-ah din a ni a, tunah hian he pawl hnuaiah hian pawl hrang hrang AMFU (Mizoram); CONFU (Confedaretion of Naga Fermers’ Union, Nagaland); Sikkim Apex Growers Association; Khasi Red Hills (Meghalaya); Future Vision (Arunachal) le Tripura Fermers Association te an tel a ni.

Assam leh Manipur State bikte hi NEFF-a member nih tum an ṭhathnem deuh avangin an la zirchiang mek a, NEFF meeting leh hunah an chungchang hi an ngaihtuah dawn a ni an ti.