NLFT helpawl ni a hriat ten tun thla ni 5, Nilaini zing lama Mamit District-a mi 3 an ruk bo chhui kawngah hmasawnna a awm thei chuang lo.
Police hotute sawi danin anmahni zawng tura tirh Additional SP ho leh Police Commando rualte chuan rukbote chhan chhuak turin an beizui zela, an mi rukbona hmun hi Rajiv Nagar aṭanga KM 5 vela hla, Badalsuri bul Bangladesh ramriah a nih avangin a rubotute hian awlsam takin Bangladesh an ram an lut leh nghala, ramhnuai kawnga kalin anmi rukbote hi Bangladesh-a an camp lamah an hruai tawh ni a hriat a ni. Puan tawh angin, mi 3 rubotute hi NLFT pawl pakhat ‘Parimal Faction’ tia hriat te ni a rin a ni a, an mi rukbote tlanna sum cheng nuai 25 an phut tih an puan hnuah cheng nuai 50 zawk nia sawi a awm leh a, he thu hi hnathawh pui Gautam Construction Company-a thawkte hnenah telephone-in an hrilh ni a thu dawn a ni.
Hetihlai hian robotute hian Mizoram lama thuneitute an rawn be pawp rihlo niin Police hotute chuan an sawia, an mi rukbote hi Nizam Uddin (28), Karimganj khua, hnathawk endiktu (Work Supervisor), Dirgudon Chakma (30) (Bijoy tia hriat bawk) Rajiv Nagar khua, Company Tipper khalhtu leh handyman Mitun Bagani (18) Silchar khua te an ni.