Education Department chuan thuchhuah siamin, SSA zirtirtute tana Teachers Eligibility Test buatsaih chhan chu sawrkar laipuiin ti tura a tih vang a ni tih an sawi.
Education Department chuan PSTE Trainess Union DIET ten sawrkara an lungawi loh vanga Press Conference koh chungchangah hemi chungchang sawifiahna thuchhuah hi an siam tih an sawi a, February 18th, 2013 khan India Sawrkar ah Programme Approval Board Meeting neih a ni a. Chuta meeting ah chuan RTE Act hman hnu (April, 2010 hnu) a SSA zirtirtu lak te reng reng chu zirtirtu atan an tlak leh tlak loh test turin a ti a. Chumi a nih loh chuan an hlawh pek tawh loh tur tih a ni. Nasa taka India sawrkar hotute ngen an nih hnuah a bikin anniho tan hian SSA zirtirtu ni zel tlak an nih leh nih loh fiah nan Teachers Eligibility Test buatsaih turin a rawn ti th an sawi a, chu chu thla 4 chhunga zo tura intiamin chumi-a tlate chu ruai chhunzawm lo turin a ti tih a sawi bawk.
He Teachers Eligibility Test ah hian condition hrang hrang a awm tih sawrkar chuan a hria a, chung zing ah chuan Pre-service kan tih ang te hi an zo tur a ni tih a nia, mahse June 17-a zirtirtu te tana buatsaih hi chu SSA-a thawk mek te tan liau liaua tih niin heta an pass anih pawh in nakin hnu zel ah TET exam nen inkaihhnawihna a nei dawn lo tih pawh Pre-Service pawl inti te pawh hi hrilh an ni a. Chuti chunga sawrkar hmalakna hrethiam duh lo luia hma an la hi chu a vanduai thlak hle tih sawiin, SSA zirtirtute he test kaltlang tur te hi mi 716 zet an ni a, India sawrkar hotute hnenah pawh hengho eizawnna ti tawp mai lo tura Mizoram sawrkar hotute ngenna avang a la chhunzawm thei te an ni nghe nghe a ni tih a tarlang bawk.