Kawnpui ram chhunga mi te tana Rel kawng zângna-dawmna sem chhuah mekah PRISM Sub-Hqrs., Kolasib chuan thil diklo tak awma hria in, Kolasib DC hnenah complain an thehlut a, zângna-dawmna pek mek chu titawp turin an ngen.
Bairabi to Sairang Railway compensation sem chhuah mekah hian Kawnpui VC Area china chhungkua 209 te hnenah Comcensation hi sem chhuah a ni a. Lalfela Sailo, Addl DC, Kolasib sawi dan chuan, Kawnpui ram chinah hian chhungkua 209 hnena sem chhuah tur a nih laiin chhungkua 49 te chu sawrkar aṭangin enfiah leh an ngaih avangin lo pe chhuak lo turin order an hmu a ni. Kawnpui ram chinah hian chhungkua 209 tan hian Rs.11,85,99,248/- semchhuah tur a nih thu a sawi bawk.
Hetih lai hian PRISM Sub Hqrs., Kolasib chuan June ni 20, 2013 khan Koalsib DC hnenah complain thehlutin, complain an thehluhah chuan LT Muana ruahmannain ram 8 chu VC pass lem hmangin mi hrang hrang hmingin Rs.63,21,600/- siam a nih thu te, RL Lalhmuaka ram chu mi 7 hmingin VC Pass a ṭhensawm a nih thu leh a vaiin Rs.1,25,21,096/- siam a nih thu te, Rev. R Thangvunga ram pawh hming 5 in VC pass a ṭhensawm a nih thu leh Rs.37,89,360/- a siam a nih thu an tarlang.
Heng te avang hian tuna compensation sem lai mek chu titawp a, lo la tawh te pawhin Bank-ah pawisa la chhuak thei rih lo tura Bank thuneitute hriattir turin an ngen ta a ni.