All Mizoram Farmer’s Union chuan Mizorama Horticulture College din tur chu Thenzawlah ngei ni thei se tih an sawi leh.
Nimin khan an pawl Gen Hqrs. President Pu Joseph H.Thanzuala chuan Lunglei-ah thuthar thehdarhtute kawmin, sawrkar laipuiin Mizorama Horticulture College din a phal hnuah, Mizoram tana hmun laili leh thlai chinna bakah Research tihna atana hmun ṭha dap a ni a ti a, hetih hunlai hian Thenzawl khaw daiah hmun rem chang tak an VC ten he College din nan hian ram an pe phal tih an sawi avangin Horticulture College din nan hian Thenzawl chu AMFU chuan a duh a, an duhna pawh Sawrkar-ah thlenin hlawhtling ngei tur a nawr zel an tum tih a sawi a ni.
Kum 2011-a Union Agriculture Minister Sharad Pawar-an Mizoram a tlawh tumin, Horticulture University emaw College a mamawh thu AMFU chuan an lo thlen a, Minister hian Horticulture College pek chu tiam nghal tih AMFU President chuan a sawi a, hetiang College hi an dil hmaa Lunglei lama dah tura lo dil ve tawh an awm a nih chuan an hma lo lak tawhna chu chhuanawm an ti tih sawiin amaherawhchu an ngaihah Thenzawl a ṭhat ber avangin Thenzawl-ah dah anih theih nan an bawhzui reng tih a sawi a ni.
Hemi hma hian Chhimbial Chhantu chuan Horticulture College hi Lunglei Pukpui ramah din nise tiin thawm an lo nei tawh a, AMFU ten Then-zawlah ni zawk se ti a rawtna an siam pawh an ngaihthiam loh thu an lo tarlang tawh a ni.