Mizo Students’ Union (MSU) chuan sawrkar hnathawk grade pay `4200 chin lak theihna Mizoram Public Service Commission kuta hlan chu eng sawkar pawh inthlak se, he thuneihna hi MPSC kut aṭanga chhuhsak MSU chuan a remti tawh ngai dawn lo tih a sawi.
Nimin khan Aizawl Press Club a thuthar lakhawmtute kawmin, MSU President Zodinpuia chuan Chief Minister hnenah leh Cabinet Minister zawng zawngte chungah he thil hi tihhlawhtlin anih avang in lawmthu a sawi a, chutih rual chuan tun hnu-ah thil diklo siamṭhat tumnaa hmalakna reng reng-ah lungawilohna lantir kher emaw, mipuite tana harsatna siam zawnga hmalakna nghak kher lova tihlawhtling ṭhin turin MSU chuan Mizoram sawrkar a ngen tih a sawi a, an thilphut chungchanga Cabinet meeting thuchhuak hriattir thuai an nih loh avangin mipui tan harsatna an siam hman chu pawi a tih thu a sawi bawk.
Niminpiaha Cabinet Meeting-in sawrkar hnalak tur chin MPSC kuta a hlan let, Grade Pay `4200 huang chhungah Post hrang hrang 142 a awm tih a sawi a, Grade Pay `4400 chin-ah hian Post hrang hrang 41 a awm bawk a, heng sawrkar hna Post hrang hrangte hi Mizo ṭhalai a thiam leh tlingte ngei, dik leh felfai taka sawrkara an luh ve theihna tura hmalakna a ni a ti a, Grade Pay `4200 chin hnalakna MPSC kut a a hlan thar tak avang hian Post 100 chuang hnalakna chu MPSC in an kut ken a ngaih dawn tak avangin MPSC Budget cheng Vaibelchhe 4.30 pawh tihlen belh a ngai ngei dawn a, hnathawktu 66 awm mek pawh 20 aia tam pek belh an ngai dawn nia sawiin, sawrkar chu Grade Pay `4200 chin hnalakna a pek ah hian a duh tawk mai ang tih MSU chuan a hlau tih a sawi bawk.