Zothlifim Logo
Loading ...

Nimin khan AH&Vety department hotute chuan Mizorama vawk natna Porcine Reproductive and Respiratory Syndrome (PRRS) chu khuahkhirh tawh a ni a, June thla hnu lamah vawk damlo hmuh belh an awm tawhlo tih an sawi.

Nimin khan AH&Vety Secretary Pu T.Sangkunga chuan Aizawl Press Club-ah chanchinbumite kawmin  ‘vawk natna chi khat Porcine Reproductive and Respiratory Syndrome (PRRS) hi kumin March-May chhungin Aizawl leh Mizoram hmun thenkhatah hmuh a ni a. Record atanga a lan danin PRRS avang hian ran puitling thi an tam ngai lova, 10-15% vel chauh thi a ngaih a ni a, chuvangin kumin a vawk hri leng vawk tam tak thihna pawh kha PRRS nilovin classical swine fever a nih rin a ni. Heng vawk damlo leh dam tawh 64 atanga sample lakte hi enfiah anih hnuah 57 chu PRRS a ni tih finfiah a ni’ a ti.

T.Sangkunga chuan, ‘PRRS hi mihring in direct taka kai theih a ni lova, mahse vawk leh vawk ah chuan inkaichhawn awl tak anih avangin a darh zel tur ven kawngah department leh vawk vulhtute tanho a tul hle a. June thla hnu lamah a vei thar hmuhchhuah a nih loh vangin min kiansan thuai kan beisei a ni’ a ti a. PRRS natna hrik chu tui sa 56 degree celcius ah a thi thei a, tui so ah phei chuan an thi vek a ni tiin mihring ei atan vawk dam leh tawh chu hlauhawm lo niin a sawi a, vawk damlo leh rinhlelhawm an awm chuan Vety department thawktute hrilh hre thuai turin mipuite a ngen bawk.

PRRS hi vawk natna, chi thlahna leh thawkna dawt natna a ni. He natna hi virus chikhat Arterivirus in a thlen a ni a, vawk rai laiah no chhiat leh thla kim lova piang a awm duh a, a note an pian huna piang pawh an chak lova, reilote ah an thi mai thin. He natna hi kum 1987 khan America ramah hmuhchhuah a ni a, 1990-92 bawr velah Europe ram hmun hrang hrang ah a darh a. Asia chhimchhak ram i.e. Thailand, Indonesia, Vietnam, Laos etc ah te darh lehin tunah hian kum 2012 atang khan Myanmar ramah a awm mek ani. India ramah chuan he natna hi hriat ani ngai lova, kum 2011 ah khan Meghalaya a Farm pakhatah hmuh a ni a, amaherawhchu Farm pakhatah chauh a hri a awm avangin hmun danga an kai darh hmain awlsam takin control a ni, a ti bawk.