Skip to content
Home » Chanchinthar » Vawksa ei thinhrik ṭul tawh lo ti

Vawksa ei thinhrik ṭul tawh lo ti

Kumin March leh April thla vela Mizorama vawk natna hri Porcine Reproductive and Respiratory Syndrome (PRRS) leng chu a rêm tawh a, vawksa thinhrik a ṭul tawhlo niin AH & Vety department hotute’n an sawi.

AH & Vety hotute’n an sawi danin PRRS natna hian March leh April thla chho khan Mizoram a tuam a, Mamit leh Kolasib district tih loh chu a tuam chhuak vek a. Department lamin theihtawp an chhuah avangin tunah chuan a lo rem ta a, vawk damlo leh thi an awm tawh lo niin an sawi a. Hetiang a nih avang hian mipui tan vawk sa thinhrik a ṭul tawh loh thu an sawi a, hri len laia veng leh khaw hrang hranga Vety doctor-te’n vawk talh tur leh vawksa hralh tur an endik ṭhin pawh an chawlhsan rih tawh a ni.

AH & Vety Director Dr LB Sailo chuan PRRS natna hi Myanmar aṭanga vawk lakluh te’n an vei Mizorama vawkte’n an kai chhawn leh ngei nia an hriat thu a sawi a. Hemi avang hian Myanmar aṭanga vawk lakluh khap tlat a ni a, khap a nih loh chuan he natna hi a lo leng ṭha leh mai ang tih an hlauh thu a sawi bawk.

PRRS leh vawkpui natna tlanglawn classical swine fever an tih mai leng avang khan Mizorama district 6-ah vawk 3,800 vel an thi hman a. A tirah chuan swine fever ni maia an ngaih laiin an rinhlelh avangin Mizorama vawk thi leh damlo te sample chu laboratory-ah endik tir a ni a, Barapani-a ICAR hmun-ah PRRS hrik hi an hmu chhuak a. Chu chu Bhopal-a High Security Animal Disease Laboratory-ah endik lehin nemngheh a ni ta a ni.

Leave a Reply

This site uses Akismet to reduce spam. Learn how your comment data is processed.