Nimin khan rampum huapin Police ram tana nun petu Police te hriatrengna hun “Commemoration Day” hman a ni.
Ni 21 October, 1959-ah Ladakh a Police Post China sipai ten an rawn la a. Police mi leh sa mi 9 an kaphlum a. He ni hi Police ram tana nun pete hriatreng nan “Commemoration Day”-ah India sawrkar chuan ram pumpuiah kumtin a hman turin a rel a. Hemi ni zing dar 8-ah hian India ram State Capital tinah leh District Hqrs.-ahte commemoration Day Parade neih a ni ṭhin a, India ram pum a Police duty laia thi te hming chhiarchhuak in anmahni hriatrengna leh sunna urhsun taka hman a ni thin.
India ram state hrang hrang-ah ni 1.9.2012 aṭanga 31.8.2013 chhung khan Police thi 576 an awm a, Uttar Pradesh-ah thi an tam ber a, Police 117 an thi a, hetihlai hian vanneihthlak takin hemi chhung hian Mizoram Police bikah thi an awmlo thung a ni.
Mizoram ah pawh nimin zing dar 8:00-ah hian Aizawl ah leh District Hqrs.-ah te Commemoration Day Parade hi neih a ni a. Aizawl-ah chuan he Commemoration Day Parade hi 1st Bn. MAP Field, Armed Veng-ah DGP Mizoram Pu AK Patnaik-a hova hman a ni a. Pu Vivek Kishore, IPS, DIG (Training) in ni 1.9.2012 atanga 31.8.2013 chhunga India rama police mi 576 duty laia nunna chante number chhiarchhuakin urhsun taka Police Parade, Police thi te sun nan neih a ni.
Hemi hnu hian Mizoram Police duty laia hmelma kut tuara thite hriatrengna “Martar Thlan” 1st Bn. MAP Hqrs.-a siamah DGP leh Police Officer dang ten pangpar an dah nghal bawk.