Zothlifim Logo
Loading ...
Mizoram NewsMizoram News

Law Minister Pu Lalsawta chuan AICC duhdan angin eirukna chhui-a hremtu tur Lokayukta chu February ni 28 hmaa Mizorama din ve tuma hmalak mek a ni, a ti.

Pu Lalsawta chuan Mizorama hman tur Lokayukta dinnatur dan chu duan zawh tawh a nih thu a sawi a. A taka tihpuitlin harsatna ber tur chu sum leh pai lamah a ni a ti a. He dan duan chhin hi a hova an thlirho tawh thu leh tunkar Nilaini chawhnu lama thlir nawn leh an tum thu a sawi bawk a. Chak taka kalpui chhoh zel a nih thu a sawi a ni.

Law Minister chuan Lokayukta dinna tur dan duan mekah hian Chief Minister leh Minister te pawh chhui-a hrem thei tur Lokayukta din tum a nih thu a sawi a. Sawrkar emaw thunun hauh lohva eirukna chhui leh hrem thlenga thuneihna sâng tak nei, sawrkar leh engmahin a thunun loh eiruk dotu pawl din tum a ni a ti. A chhuitu hi ACB emaw sawrkarin a thunun theih leh a hnuaia awm hman a nih chuan Lokayukta ṭha a ding thei dawnlo nia an hriat thu a sawi a. An duhdan taka kalpui tur erawh chuan sum leh pai a ngai tam dawn hle a, Lokayukta ber chu High Court Chief Justice tlukpui tur a lo ni a, member dangte kha High Court Judge tlukpui an nih bawk chuan an hlawh ringawt pawh tam tham a ni dawn a ni, a ti.

Pu Lalsawta chuan a chhuitute leh hnathawk dang zawng zawng pawh sawrkar hnuaia thawk nilo hman vek tura ruahmanna siam a nih bawk avangin tun dinhmunah chuan sum dinhmunin a tlin rihlo niin a sawi a. Finance Commission-ah dil tum a ni a, mahse anni hian a tira a ruhrel dinna bak an tum zui a beiseiawm vakloh nia an hriat thu a sawi bawk.

Lok Ayukta dinna atan dan duangtute sawi danin Draft bill-ah hian bung 15 leh chang 61 a awm a. Law minister hova sawihonaah hian, Lokayukta hman a nih dawn avanga senso ngai turte chhût chhuak turin Law & Judicial department tih an ni a; senso ngai turte hi tun thla 14th Finance Commission hotute’n Mizoram an rawn tlawh hunah lo thlen a, sum dil tum a ni.

Law Secretary Pu P. Singthanga chuan he dan hi hmanhmawh taka hman a nih dawn chuan a ṭul dan anga Ordinance pawh siam theih mai a nih thu a sawi a. Tuna an duan chhin danah chuan Lokayukta ber leh member-te hi kum 5 term atana ruat an ni ang a. Sawrkarin a bân thei lovang a; an hna an chawlhsan hnu-ah sawrkar hnuaiahhna an thawh phal a ni tawh lo bawk ang.

Lokayukta leh a thachhang dawltu tur zawn hna chu sawrkarin a din Search Committee-in an buaipui in a thlangtu tur Selection Committee hnenah an rawtna an thehlut ang. A thlangtu tur Selection Committee member-te chu Chief Minister, Assembly Speaker, Opposition Leader leh Gauhati High Court Judge te an ni ang.

Lokayukta dinna tur atana dan duan sa hi Parliament-a lo ngaihtuah tawh, Lok Sabha phei chuan a pawm tawh a ni a. Mahse, Rajya Sabha-ah tlang lovin, State sorkar khawih tur a ni tiin state sorkar tin mawhah an dah ta a. An lo duan sa ang zulzui deuh hian a tlangpuia kalpui a nih thu Drafting Committee member-te chuan an sawi a. Hei bakah hian state thenkhatin an lo siam tawhte en a ni a; MZP leh tlawmngai pawlte’n mithiam leh he lam ngaihtuahmite khawma an lo duan lawk pawh en tel a nih thu an sawi a ni.