MJA Annual Conference vawi 7-na hman a ni

Andrew H.Lalremruata

Zirtawpni nileng khan PWD IB, New Serchhip-ah Serchhip District MJA Annual General Conference Vawi 7-na neih a ni a, Pu Andrew H.Lalremruata, MIS, DIPRO Serchhip chuan khuallian niin a hmanpui a, MJA General Headquarters aṭangin an President Pu C.Lalrambuatsaiha, Vice-President Pu Vanlalrema Vantawl leh hruaitu dang engemawzatin he hun hi an hmanpui a, an pawl hruaitu thar an thlang nghal bawk.

MJA Conference

He huna khuallian Pu Andrew H.Lalrem-ruata chuan thusawiin, chanchinbumite chu mipui ngaihah pawh mipuitling leh rintlak an nih avanga an chezia leh ṭawngkam chhuak thlenga fimkhur turin a chah a, thuthar puanzar mai bakah khawtlang siamṭhat kawngahte, Sawrkar khalhngil kawngahte an mawh-phurhna sânzia hriaa intuaihriam reng turin a fuih a, chi leh chi, hnam leh hnam inkara buaina chhuak thei vên kawngah te pawh an thuchhuak te chu mipui ngaihchân ber a nih avanga fimkhur turin leh ngaihtuahna fim tak hmanga mipuite zirtir zel ṭhin tura chahin an zahawmna vawnhim kawngah dik tak leh felfai taka che ṭhin turin a fuih a ni.

Chawhma inkhawmah hian C.Lalrochhuanga, Editor, Zothlifim Daily Newspaper chu MJA member atan Pu C.Lalrambuatsaiha, President, MJA General Headquarters chuan lalutin fuihna thu a sawi a, Serchhip khaw tlangval tunhnaia MCS a tling thar Pu Lalnunfela Chawngthu chu Serchhip MJA hmingin an President Pu Kapliana Pachuau-in lawmpuina thuziak a hlan bawk a ni.

Chawhma inkhawm hi Pu Lalremruata Ralte, Vice-President, MJA Serchhip District-in a kaihruai a, Presidential Speech Pu Kapliana Pachuau hnen aṭang ngaihthlak niin, Pu Zonunsanga Kawlni hnen aṭangin General Secretary Report ngaihthlak ani a, Pu C.Lalhminghlua, Treasurer hnen aṭangin financial report ngaihthlak a ni bawk. Tunah hian Serchhip District-ah MJA member 16 an awm mek a ni.

Chawhnu lamah MJA General Headquarters kum 2014-2016 chhunga an hruaitu tur an thlang a, President-ah Kapliana Pachuau, Editor, Serchhip Times thlangin, Vice President-ah Lalremruata Ralte, Editor, Ramlai Arsi leh Treasurer-ah C.Lalhminghlua, Editor, Laisuih te an thlang a, anni bakah hian Executive Member  mi 5 an thlang bawk a, chungte chu – PC Vanlal-hruaia, Production Manager, TT Vision; H.Lalbiakzauvi, Editor, Serkhawpuii, C.Ram-engmawia, Editor, Lamkal, Zonunsanga Kawlni, Editor, Lenkawl leh PC Zonunsanga, Editor, Thenzawl Today te an ni.

Leave a Reply

This site uses Akismet to reduce spam. Learn how your comment data is processed.