MZP chuan Borapansury khaw daia Zofate Chawlhbuk sa tura thawkchhuak MZP Headquarters Lunglei hruaitute man an ni chu hriatthiam harsa an ti tih nimin khan thuchhuah siamin an sawi a, Mizo khualzin veivak te chawlh hahdamna tura chawlhbuk sak a ṭhat lohna chhan sawifiah turin sawrkar thuneitute an ngen tih an sawi.
An thuchhuaha an tarlan danin, Borapansury-a ZofateChawlhbuk sak a nih theihna tur hian Lunglei MZP Headquarters chuan kum 2012 September ni 22 aṭang tawh khan hma la ṭan tawhin, Chakma Autonomous District Council (CADC) hotute pawhin engmah dodalna an neih loh thu Lunglei MZP Headquarters hruaitute an hrilh a, hei bakah hian nikum November ni 30-a Tlabunga Lunglei MZP Headquarters Conference neih ṭuma Boranpansury khua an tlawhin, Borapansury khaw hruaitu Joint VC leh Young Chakma Association te chu meeting neih puiin chawlhbuk sak chungchangah harsatna engmah a awmloh thu an sawi a ni an ti a. Tun thla ni 9-a Central Young Chakma Association(CYCA) meeting pawhin Borapansury a ZOFATE CHAWLHBUK sak tur chu an thlawp thu an sawi bawk laia chawlhbuk sa tura thawkchhuak te dan bawhchhia ang hial leh pawih khawih tum anga ngai a man an ni ta mai chu an hrethiam lo hle a ni an ti a, MZP General Headquarters bultumin ZOFATE CHAWLHBUK sak a nih theih nan hmalak a ni dawn tih an sawi bawk.
Zofate chawlhbuk sak tuma thawkchhuak MZP hruaitu, man tawk ta te hnena Chakma Students’ Union hruaituten, “In duh leh chawlhbuk chu in ramah sa mai rawh u” an tih ang ngeiin kan ram chhung ngei, Borapansury hmunah March 2014 ral hma ngeiin MZP General Headquarters hmalakna in ‘ZOFATE CHAWLHBUK’ chu sak a ni dawn tih an sawi a, ram leh hnam humhalhna tur a nih phawt chuan MZP chuan engpawh huamin hma a la zel dawn a ni an ti bawk
MZP chuan Borapansury khuaah hian Chakma ho hian Mizo sumdawng te hnenah pawisa te khawm thin in harsatna tam tak an siam sak ṭhin tih an sawi a, kan mikhual Chakma ten a ram leilung fa Mizote chunga harsatna an siam ṭhin chu bansan tawh turin MZP chuan a ngen tak meuh meuh tih sawiin, heti tak maia kan ram, Mizoram chhung ngei a hnamdang, Chakma ten mikhual nih inhre map lova an khawsa ta mai hi MZP chuan chhuifiah lehzuala hmalak chhunzawm a tum tih sawiin, dan lova khawsa Chakma foreigner te chu dan anga hnawhchhuah ngei an nih theih nan a tawp thlengin hma an la dawn tih an sawi bawk.