Aizawl khawpuiah Street Fighter; Zan lamah pawisa inchawia insual an awm!

Tunlai hian Aizawl khawpui chhung khawlai dung-ah zan lama pawisa inhawia insual thin an awm a, heng mite hian ₹1000/- aṭanga ₹3000/- te an inchawi tlangpui thin ni a hriat a ni.

Hemi chungchang Zawlbuk chanchinbuin a chhuichiannaah chuan, hetianga pawisa inchawia insual ṭhinte hi Zodin Square leh a chhehvelah huaihawt ṭhin a ni a, zanrei lam-ah a ni tlangpui a. Zantin deuhthaw heti anga pawisa inchawia insual hi an awm ṭhin ni a hriat a ni a, heng pawisa an inchawi hi insualnaa a chak zawkin a nei ṭhin a, kartawp lam zirtawp zan leh inrinni zanah te pawisa inchawia insual hi a hluar ṭhin nia hriat a ni bawk.

Hetianga pawisa chawia khawlai dunga insual huaihawtna a tel ṭhin mipakhat Zawlbuk chanchinbuin a kawm chuan, ‘fair takin pawisa inchawia insual hi an kalpui ṭhin’ tih a sawi a. Nunna atana derthawng khawp leh pianphunga rualbanlohna khawpa inkhawih phal a nilo tih sawiin, “Fair takin a chak zawk an chak a, fair tak bawkin a chaklo zawk an tlawm ṭhin,’ a ti.

“Pawisa chawia insual huaihawt thinah hian hmeichhe insual pawh an awm ve tho thin a, mahse, a tlangpuiin mipa kan ni tlangpui a, hetiang insualnaa kan tel dawn avang hian kan theih chin chinah kan inla ‘fit’ ve thin,” a ti bawk.

Zodin Square leh a chhehvela pawisa chawia insual huaihawt thin-ah hian a hranpa taka huaihawttu leh ruahmanna siamtu an awm hranpa lo a. Hmun hrang hrang aṭanga ṭhianho kalkhawm leh zanrei lama khawlaia lengho inrawt phurin an pawisa inchawi ngam zât te inzawtin, fel taka an pawisa inchawite an dah fel hnu ah pawisa inchawi hian an insual mai ṭhin a, hetianga pawisa inchawia an insualnah hian hmanrua engmah thawh phal a ni ngailo, tiin thudawnna chuan a sawi a. Mipa lamah chuan felfai takin thil a tih theih mai laiin, hmeichhe lamah chuan buai zui fe ngaihchang a tam hle niin a sawi thung. Heti anga khawlai dunga pawisa chawia insual ṭhinte hi zanrei lama Police duty te pawhin um darh chang an nei fo tawh thin ni a thudawn a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram