Home Minister, Excise changtu ni bawk Pu R.Lalzirliana chuan MLTP Act aia ṭha zawk, Mizoram Liquor Prohibition Control Bill, 2014 chu March thla Assembly Session lo awm turah put luh a nih dawn tih a sawi.
Nimina Aizawl Congress Bhavan-a Political Sessionah he thu hi puangin, he dan hnuaiah hian Excise Force te chu thuneihna sâng zawka thuam an ni ang a ti a, Mi a ruih leh ruih lo doctor finfiahtir kher ngai lovin zu in tam leh tam loh finfiahna, “alcolyser” hmangin Excise lam chuan zurui leh rui lo an finfiah ve thei dawn a ni, a ti.
NGO te pawh thuneihna nena thuam an nih dawn thu sawiin “Group of Society” tia vuah te chuan zu rui leh ruih avanga buaina siamte chu an man thei dawn bawk a ni, a ti a. Zu rui man te pawh a hrem dan uluk taka duan a nih thu sawiin zu rui man te hremna nêp ber pawh thla 2 tân a ni dawn a, a rei lam zawngah pawh kum 2 thleng tântir theih an ni dawn a ni, a ti.
Home Minister chuan he Dan hi a pawimawh hle tih a sawi a, Mizoram chu zu laka a hmel a lo fai zawk theihna tura an duan Mizoram Liquor Prohibition Control Bill, 2014 chu hman a nih theih nan Zoram mipui leh Kohhran zawng zawng ṭawngṭaipuina a ngen tih a sawi a ni.
He hunah hian, Social Welfare Minister Pu P.C. Lalthanliana pawhin thusawiin MLTP Act thlahdul Mizoram Sawrkar-in a tum chungchangah Kohhran chuan an biang ding lamah a bêng a ni ber a, amaherawhchu Mizoram tana ṭha tur kalpui chungchangah a ṭul a nih phawt chuan an biang vei lam pawh an dawh leh mai tur a ni, a ti.
Drugs a inchiu ṭhin te pawh hriau thianghlim lo an hman avangin natna ṭhalo an inkaichhawng ṭhin a. Hemi tihreh nan hianhriaute pawh an sem a ngai a. A tirah chuan khawtlang leh Kohhrante pawhin hriau sem chu an ngai thiam lo a. Mahse tunah chuan a ṭulzia hretlângin, hriau leh condom te chu khawtlang thianghlim zawk nan inthlahrung hauh lovin sem a ni ta tih a sawi a, hetiang deuh hian zu pawh khuahkhirhna khauh tak hnuaiah zawrh a nih chuan khawtlang a thianghlim zawk ngei ang a, ṭhalaite pawh an hrisel zawk dawn a, chu chu ramin a ṭhatpui zawk pawh a ring tlat tih a sawi a ni