Serchhip News

Anti-Tobacco Squad-ten Tuichang ral khaw hrang hrang tlawh

Nimin khan Serchhip District Anti Tobacco Squad ten Serchhip Dist khaw 4 – Khawlailung, Chekawn, Mualcheng leh East Lungdar tlawhin puipunna hmun, zirna in leh sawrkar pisaah te meizuk khap a nih thu an hrilh a. Heng khaw 4-a dawr hrang hrangah lutin a remchan dan angin dawr nei te chu kokhawm-in, danin mezial leh vaihhlo aṭanga thil siam reng reng, health warning awm lo chu zawrh theih a nih loh dan te an hrilh.

Tun ṭum hi Anti Tobacco Serchhip Dist in Tuichangral khuate an tlawh ṭum khatna a nih avangin phal lohna hmuna mei zu leh health warning awm lova vaihhlo kaihhnawih zuar an hmuh te an man nghal lova, an kal leh huna man an nih tawh tur thu an hrilh bakah, zirna in leh sawrkar pisa leh dawra tar tur thuziak an sem nghal a ni.

Anti-Tobacco Squad te chuan BDO East Lungdar Office leh Office hrang hrangah te chuan meizuk phallohna hmun tih thuziak an tar ṭha hle tih an sawi a, heta kal squad member te hi – Pu Lalramnghaka Kawlni Pu Darhmingthanga, Pu C.Lalhminghlua leh Pu Vanlaldailova te an ni

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram