Serchhip Chapchar Kut

Chapchâr Kût lawm tura inpuahchahna thlirho

Nimin chawhma dar 11 khan Serchhip-a Chapchar Kut, 2014 lawm dan tur ngaihtuahtu ‘Chapchar Kut Organising Committee’ chu an Chairman Pi Juhi Mukherjee, IAS hovin DC Meeting Room-ah an ṭhukhawm a, Chapchar Kut hmang tura inbuatsaih dan kalmek te leh Chapchar Kut lawm dan tur Programme Sub-Headquarters YMA, Serchhip ruahman chu uluk taka an thlir ho hnu ah pawm a ni bawk.

Serchhip Chapchar Kut
Serchhip Chapchar Kut 2013

Ruahman dan chuan Chapchar Kut, 2014 hi Sub-Headquarters YMA, Serchhip bultumin March ni 7, 2014 ah Leisekawt Mual, Serchhip P&E vengah hman tur a ni a, chawhma dar 11-ah programme ṭan a ni ang a, Kût Pa atan Pu RL Chhuanawma, President, Sub-Hqrs YMA, Serchhip  beisei a ni a, Kut thlengtu tur chu Pi Juhi Mukherjee, IAS, Serchhip District Bawrhsap a ni ang. Serchhip Khawpui huamchhunga YMA Branch 21 tel tura beisei niin, Mizo lâm chi hrang hrang Tlang Lâm, Solakia, Chawnglaizawn, Bualpui Cheraw, Kân Tluang, Mitthi Rawp Lam, Khuallam, Chheih Lam, Chai leh Mal Zai chi hrang hrang te leh thildang benglut tak tak entir a ni ang.

Chapchar Kut neihna tur hmun hma leh Pavillion chei fai turin Serchhip DC Office ruat an ni a, kawlphetha khaihlak palh thuta harsatna a awm loh nan DRDA, Serchhip-in power generator an thawh dawn a, mipui kalkawmten tui thianghlim in tur hnianghnar an neih theih nan PHE Department in ruahmanna a siam dawn a, LAD in bawlhhlawh paihna tur bawm an ruahman dawn bakah 14 Assam Rifles ten daihlim a mipuite an ṭhut theih nan Puan In engemawzat an kaih bawk ang. Leisekawt Mual a khuk lutuk loh nan  Fire Department- in tui in an phuh dawn bakah Sub-Headquarters YMA, Serchhip in mipuite tan Thingpui sen hang leh Kurtai engtik lai pawha a thlawn a ei leh in turin a chhawp dawn bawk a ni.

Organising Committee Chairman, Bawrhsap ni bawk Pi Juhi Mukherjee, IAS chuan Chapchar Kut hmanna tur sum an dawn ang china senso khunglut hram turin organizing committee chu a ngen a, Sub-Headquarters YMS, Serchhip in Chapchar Kut programme felfai taka an lo buatsaih leh ruahmanna tha tak an lo siam chu lawmthu a hrilh bakah dan leh thupek kenkawh kawnga harsatna awm lo tura mipuite nungchang fimkhur vek tura a beisei thu a sawi bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram