MISA-in khawmpui hmang

Mizoram News

Nimin chawhma dar 11 aṭang khan Mizoram Information Service Association chuan I&PR conference hall-ah annual conference-ah an hmang a, Pu Lal Thanzara, Minister of State I&PR, etc,. chu khuallian a ni.

MISA Annual conference chawhma hunah hian “Media as Custodian of Public Interest : Synergy between roles of I&PR and Media Units” tih thupui hmangin workshop neih a ni a. Rorelna tha a awm theihna tura media te  pawimawhna leh hemi kawnga sawrkar leh media inkara inkungkaihna tha a pawimawh zia zir ho a ni.

Khuallian Pu Lal Thanzara chuan “Information & Public Relations  chu department lian ni lo mah se, sawrkar hmalakna kawng tinrengah a serh zinga a mei ang niin sawrkar-a a lailum luahtu a ni, a ti a. Sawrkar hmalakna zawng zawng puangzartu an nih avangin media te nen thawhhona ṭha an neih a pawimawh hle a ni, a ti a. Sawrkar leh media inkungkaihna chungchang zirhona tura MISA-in workshop a buatsaih chu lawmawm a tih thu sawiin zirhona aṭangin thil enzui tur tam tak a awm a ni, a ti. Pu Lal Thanzara chuan media-ten sawrkar an thawhpuinaah lawmthu a sawi a, Mizoram sawrkar chuan eirukna do te, NLUP dik taka sem leh hman dik te a ngai pawimawh chhunzawm zel dawn tih a sawi bawk.

He Conference-ah hian I&PR Secretary Pu C.Thatkunga pawhin MIS officer te leh media te ṭan lâkna tur a pawimawh te tarlangin thu a sawi a, chanchinbumite nen thupui zirbing tura chhawp chhuah pahnih – ‘Media leh sawrkar inkungkaihna’ chu Pu C.Lalrambuatsaiha Mizoram Journalists’ Association President chuan a sawi a.  ‘Media-ten tunlai khawvel thu thehdarhna hman ṭangkai dan’ tih chu Pu Mangjangam Touthang Dy. Director (M&C) PIB chuan a sawi bawk.

MISA annual conference hi Pu David L.Thangliana, President MISA in a kaihruai a. Chawhnu hun hi rorel nan hman a ni a. MISA khawmpui rorel zingah MIS tana Joint Secretary post 1 dah chungchang leh New Delhi-a I&PR Information Centre tihnun leh chungchang te chu lungrual taka passed a ni a. Heng bakah hian District huam chhunga Media kaihhnawih sawrkar hmalaknaah I&PR department district office te kaltlanga thil tih ni rawh se tih te; MIS te hnathawhna atana pawimawh PR skill/film/Photography/Audio-Visual/Arts a officer te intuaihriam nan state pawna traininga intirh leh department tihchangtlunna leh inrelbawlna siamṭhatna tur thil pawimawh dang te rel a ni bawk.

Nimina MISA Annual conference chawhma hunah hian Central media unit hrang hrang leh Press, Cable TV, IIMC Mizoram aṭang te in mi ṭhahnem tak an tel a ni.

Leave a Reply

This site uses Akismet to reduce spam. Learn how your comment data is processed.