MNF party chuan thuchhuah siamin, Chief Minister Pu Lal Thanhawla chu March ni 14, 2014-a a thusawiah ‘Hrangturzo bial MLA Bye-Election lo awm tura an candidate a puannaah, he bial mipui te’n ruling party an vote tling duh lo a nih chuan, Congress Ministry-in an mamawh châkkhai dîl dawn pawh ni se, tukkhum chhan an lo chhawn a nih pawhin an vui thei lo ang,’ tia ngaihthlak theiha vauna aw-kâ chhâkchhuakah an puh.
MNF chuan Chief Minister ṭawngkam chhuak chu pawi an tih thu leh an hriatthiam loh thu sawiin, amah thlangtlingtute zah lo leh hmusit hle nia an hriat thu an sawi a, “Mizo mipui mimir leh, kohhran bakah a sawrkar venpuitu tura an din, Ethics Committee-te mitmei pawh a veng duh eih lo mai hi MNF chuan thlir liam mai mai har a ti a. Ram khat hotupa ber tawngkam chhuaka mawilo a chhak chhuak zing lutuk leh, indeuhsawhna, runluihna nia ngaihtheiha kohhran hnarkaitute thleng pawha a vai hma mai hi, MNF chuan demawm kan ti ta hle,” an ti.
Tun dinhmuna Mizoram sum harsatzia leh Aizawl Norh leh South Treasury khar loh chauhva a kal dawr dawr dante, Bill pass hleih theih a ni ta lo te chu Chief Minister sawrkar, financial management-a a fail chianzia tilangtu-ah an ngai tih sawiin, “MNF party chuan CM Pu Lal Thanhawla sawrkar hi mipuiin kan venpui a ngai takzetin kan hria, an ti.
Hetihlai hian Tuichangral Zirlai Pawl pawhin thuchhuah siamin an bial Hrangturzo –Assembly bye election neih turah mahni party candidate vote tura mipuite vauna ṭawngkam niawma ngaih theih political party ṭhenkhat hruaitute’n mipui hmaah an sawi nia tarlangin, a lo dawngsawngtu bial mipuite tan a rilru nat thlak bakah in zahlohna lian taka an ngaih thu an sawi ve bawk.
Tuichangral Zirlai Pawl hian Inrinni zing emergency extended office bearers meeting Aizawlah neiin, hemi chungchang hi an sawiho a, chhia leh ṭha hriatna zalèn tak hmanga mipuite’n an duhzawng vote tura fuih tu tur nizawkin heti zawnga ṭawngkam an nei ta chu bial mipuite thamlohna leh hmusitna lian takah an ngai tih an sawi a. India Danpui in mitin te an duhzawng, an aiawhtu tur an thlan a phalsak a, he zalènna neih hi zahsak hram turin Political Party hruaitute an ngen tih an sawi a ni.