Revenue Department a khirh dawn: Revenue Minister

Revenue Minister Pu R.Romawia chuan a bialchhunga Chaltlang North Khawtlang hruaitute, Chaltlang Lilly venga a kawmnaah sawrkarin Revenue dan thar a siam mek hman a nih tur chungchang sawiin, Revenue Department a khirh dawn tih a sawi.

Pu R.Romawia chuan mi ṭhenkhat ram ngah em em leh hmang ṭangkai lem lo an awm ṭeuh laiin eizawnna tura huan siamna fahran chu sawiloh insakna tura ram zimte pawh nei zo lo Mizoramah kan awm ṭeuh tawh a hei hi thil diklo lian tak a ni a ti a. Sawrkar chuan in hmun pass pek tur te a rua-hman mek a. Heng in hmun te hi mimal leh a chênpui chhungkaw member dangte in hmun la nei miahlo te hnenah chauh pek a ni ang a ti.

Ram leh in hmun fel tawk lovangin miṭhenkhat ten sawrkar an khinga, Revenue department pawn leiman tam tak a chawi tawh a, Department lam te pawh kan inenfiah ang a, Revenue dan thar duan mek te pawh hi a nih dan ang anga khauh taka kalpui a ngai dawn a ni a ti a. Ram inchuh thubuai chu tun dinhmuna Ukil te thubuai hlawk ber a nih tawh thu sawiin, hetianga kan ram a kal zel chuan thisen hial te pawh kan la inchhuah ang tih a hlauhawm tawh a ni a ti. Mizoram 21,081 sq.km a zau hi a len belh hmel si lova, Mizo mipui tamtaka la pung zel tur hian Pathian min pek, ram zimte hi duhamna tellova rualkhai zawka insem kan zir a ngai a ni a ti bawk.

Chaltlang North khawtlang hruaitute leh Minister inkawmna hi an Local Council hotuten an kaihruai a. He hunah hian an vengchhung mamawh hrang hrang te Min ister, an bialtu MLA nibawk hnenah hian an lo thlen a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram