Zothlifim Logo
Loading ...
Mizoram NewsMizoram News

Khehpuam tia hriat lar, Pseudoephedrine tam tham tak neitu nia puh, Lalremsangi Fanai, Falkawn chu May 26 khan ND& PS Judge Lucy Lalrinthari’n interim bail-in a chhuahtir. Lalremsangi hian doctor lehkha a neih vanga bail-a chhuah a ni.

ND&PS Judge chuan, Lalremsangi hian Alpha Hospital doctor hnen aṭangin damlohna lehkha a neih thu a sawi a, “Depression nei nasa lutuk leh mahni pawh intihlum mai thei angin doctor lehkhaah tarlan a ni. Doctor lehkha an neihah kan lo ngaih pawimawh loh ringawt chuan kan tan a pawi ve thei a ni,” a ti. Judge sawi danin, Lalremsangi Fanai hnena interim bail pek hi thla khat chhung atan a ni a, June 26-ah Court-ah inpe leh tura tih a ni. Lalremsangi thurualpui nia rinte erawh bail pek an ni ve lo.

Mizoram police District Special Branch-te chuan, April 17 leh 18 zan dar 11:45 khan Ngai-zelah Bolero MZ-01 H-7168 aṭang-in pseudoephedrine kheh sa, buhfai ipa dah kgs. 181 an man a, Ngaizela Kudam pakhat aṭangin pseudoephedrine kheh sa kgs. 17 man tel a ni a, Police-ten an chhui chian hnu-ah a bul tumtu bera an hriat Lalremsangi Fanai (36) d/o Rinchungnunga, Falkawn leh damdawi an man kaihhnawihah hian mihring 6 man tel an ni bawk a, Ngaizela Lalremsangi kudam atangin pseudoephedrine kheh sa kgs. 112 an man leh a ni.