Mizoram News

Selam buaina chhungchanga thil hmuh dan puang

Prism leh Human Rights & Law Network chuan Selam khuaa buaina chhuak a hmuna kala an enfiah hnuah, buaina avanga sawrkarin ralthuam famkim nena police tam tham tak a tirh ten Selam khua an thlen khan, rambuai laia khuaa vai sipai lut mipuiin an hlau ang mai khan mipuiin an hlau a ni, an ti.

An thuchhuahah chuan, thil awmdan an zirchian tarlangin Mizoram sawrkarin Lengteng Wildlife Sanctuary a siamhuamchhunga Selam khaw ram zatve vel rinluh a tumna chu a tir aṭangin Selam khaw mipui leh khawtlang hruaitu ten an duh lo a, amaherawhchu an khaw mi thenkhatten phuahchawpa pawl din chawpin heta an Chairman anga inchhal hian engvang emawin Wildlife Sanctuary-a an khaw ram rinluh tumna hi remtihna a lo ziak ru a ni.

Hetiang a nih avang hian sawrkar nen an indawr zui fo hnuah phut nei chungin an khaw ram hi Wildlife Sanctuary-a rinluh an remti a. October 14, 2010-a an demand, sawrkar pawhin a pawmpui-ah chuan – chhungkaw tin cheng nuai 10 pek te, Selam khuaa sawrkar hnathawk nghet awmte an duh thlanna hmuna dah te, Kohhran Biakin tana Compensation pek te a tel a. Cheng nuai 10 hi a hlawmin, kum hnih ral hmaa pek tura tih a ni a. Kum 2010-a an tiam tawh a nih lai hian, kum 4 deuhthaw a ral hnu vawiin thleng hian cheng khatmah pek an la ni lo a ni.

Pawl 2 sawi dan chuan, Selam mi thenkhat chuan Dan bawhchhiain thing an zai ngei a. Heng thingzai ṭhen khat hi thingzai neitu emaw khaw chhung mi tumah hrilh lovin a rukin Environment & Forest Department mi leh sa te hian motor-a phurh an tum a. Hei hi feh haw in hmuin midang an hrilh chhawng a, buaina a chhuak ta niin an sawi a, Selam mip ui chuan an khaw ram hi Wildlife Sanctuary-a dah loh a nih theih nana hma lakpui turin an pawl chu an ngen tih an sawi a, hemi chungchang hi PRISM leh HR&LN hian an la ngaihtuah leh dawn tih an sawi.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram