Mizoram Consumer Union chuan thuneitu, Mizoram State Transport Authority thu ngai pawimawh lova mihring chuanna Motor neitu ten an motor chuan man an tisang ṭhin chu mipuite ngaih pawimawhlohna leh an harsatna siamsakna nia sawiin, he tiang hi tunhnuah thleng tawhlo se a duh.
He mi chungchang hi Mizoram Consumer Union Executive Committee meeting, Inrinnia Aizawla neih chuan an sawihova, Mizoram State Transport Authority tun kar tawp lama thukhawm tur chu thil awm dan leh thil man te, nitina inhlawhfate hlawh zatte chhuta, Motor chuan man ennawn turin a ngen a, Transport Operator-te nawrna avanga mipuite harsatna siam lo zawnga thil ti turin a ngen a ni.
Hemi chungchangah hian MCU chuan Transport Minister, Pu John Rotluangliana pawh hmuh an tum dawn a ni.
He MCU Executive Committee meetingah hian eirawngbawlna Gas harsatna, khawih chingpen leh buk tlinglo tizia awm tura PRISM nena thawh dun rawtna pawh ngaihtuah a, lawm taka pawm a nia, Sawrkar-a thuneitute nen chak taka thawh ho theih an duh thu tarlan a nih bakah Petrol leh Diesel pawlh dal leh titre tlinglo a hralh awmte pawh entel an rawt a ni.
Hengte bakah hian Electric hman man chungchanga thil dik tawklo awm nia hriat chungchang bawhzui tura Central YMA nena thawh dunna neih rawtna pawh sawihova, lawm taka pawm a ni a, MCU chuan Power and Electricity Dept. chu Electricity Act 2003 in a phut anga Corporation a leh phawt leh chumi ruala Generation, Transmission leh Distribution te dah hran chu thil tih puitlin hmasak tura a ngai tih tarlan a nia, Central swrkarin Power and Electricity Dept. siam that dan tur a ruahman anga thil tih phawt a nih loh chuan Joint Electricity Regulatory Commission for Manipur and Mizoram hian Department rawtna ang ang pawmin, Electric hman man tisang tawh lo se tih chu an ngaih dan a ni tih he meetingah hian tarlan a ni bawk a ni.
He Meeting hi MCU President, Pu Thanglura’n a kaihruai a ni.