Chief Minister, Pu Lal Thanhawla chuan Chief Minister chuan sum inrenchem chungchang hi kan sawi fo tawh a, sawi nawn leh ṭhin hi a ngai a ni a ti a, hun khirh tak kan hmachhawn mek a, thutlukna khauh tak pawh siam ngaihchang a awm dawn a ni a ti.He thu hi Mizoram sawrkar hnathawkte tana nimina Assembly Annexe Conference Hall-a sum renchem leh sum lakluh dan chungchang ‘Sentitization of Government Officials on Economy Measures & Resources Mobilisation’ tih inhrilhhriatna neihna hunah Chief Minister hian a sawi a, Chief Minister chuan tuna kan sum dinhmun hi a hniam hle a, hreh tak chunga thutlukna khauh tak, mahse ṭha bawk si lak hi kan hreh tur a nilo a ti. Chief Minister chuan kum tam tak kalta aṭang khan sum hman tlem hi kan thupui ber ṭhin a ni a, nimahsela tihpuitlin erawh a harsa a ni a ti a. Finance department pawhin vawi tam tak inrenchem a ṭul thu a chhuah ṭhin a, heng thuchhuah te hian zawm a hlawh ṭhalo hle ṭhin a ni a ti a. Official-a zin leh motor petrol chungchangah kan inhrêk hle a ṭul a ni tiin, Delhi kal ngai kher lovin Delhi Mizoram House-a Officer on Special Duty (OSD) sawrkarin a dah thar chu a hman ṭangkai theih a ni a ti.
Chief Minister chuan ṭul bik tak takah lo chuan hna thar siam leh motor thar lei te chu khap a ni a ti a, tunah hian motor enkawlna leh workshop bill tam tak sawrkarin pek tur a nei a ti a, hetihlai hian official ten an zinna TA/DA an hmuh theih chung pawha pawisa ṭhâm ching an awm hi sim tur a ni tiin, petrol quota piahlama coupon dil ching an awm ṭhin te chu an inbihchian hle a ngai a ni a ti a. Inrenchemna tura hmalaknaah te lua a awm lo tiin, sum harsatna sutkian kawngah kan thiamna leh theihna thawhkhawma ṭan kan lâk tlan chuan thlaphanna tur a awmlo a ti a. Hmasawnna chu a kal reng tho a, keimahniin kan tihtur ang ang kan ti tur a ni a ti. Khawsak chungchangah te mahni lakluh mila khawsak thiam turin mitinte a chah bawk a ni.
Finance Minister Pu Lalsawta chuan kan state sum leh pai dinhmun leh harsatna hi tun kum hnih khat thila lo awm a nilo tiin, kum tam tak aṭanga lo inmun chho tawh, kum tela lo nasa hret hret a ni a ti a. Abikin kum 2008 – 2009 chhoa khawvel ram hrang hranga recession-ina a nghawng kal zel kha a ni a ti a. Chuvangin vawi leh khata siamṭhat thut theih a nilo a ti a. Ṭan kan lâk mar pât reng a ngai a ni a ti a, sum inrenchem kawngah hian Finance department chuan hma a la zui ang a ti.
Pu Lalsawt a chuan kum 2013 -14 chhungin sum hmuh chu cheng vaibelchhe 424.25 niin, kum 2014 -15 chhungin cheng vaibelchhe 548.87 lakluh beisei a ni a ti a, hei hi kan GSDP 2.59% leh 2.76% chauh a ni a ti a. Buhfai, tui leh electric a subsidy a pek avangin sawrkarin thla tin cheng vaibelchhe 26 vel a hloh ziah a ni a ti a. Thla tina sum kan hmuh leh hman dan tlangpui pawh, sum lakluh zat chu cheng vaibelchhe 261.13 anih laiin kan hmanral erawh chu cheng vaibelchhe 329 vel a ni a ti.
Inkhawm kaihruaitu Chief Secretary Pu Lalmalsawma, IAS chuan Mizo te hi a hnam anga sum hmang thiamlo, hmuh ang ang hmang mai zel kan ni a ti a. Central Pay Scale kan hman pawh hi Mizoramah chuan kan hmang sâng zawk a ni tiin, engtik hunah emaw chuan kan sum lakluh mila pay scale te hi kan siam ṭul hun a awm a rin thu a sawi bawk.
Inkhawmah hian department hotu ten inpawh takin sum inrenchem chungchangah sawihona an nei bawk a ni.