Mizoram chhunga LPG Consumer te tana Direct Benefit Transfer for LPG (DBTL) Scheme hman tur chungchangah sawrkar chuan scheme kalphung tur chu Distributor ṭhenkhat ten an zawm ṭha lo hle tih hriat a ni a, ti a, sawrkar thupek zawm lo te chu LPG (Regulation of Supply & Distribution) Order 2000 tlawh chhana hrem an ni ang, a ti. Food Civil Supplies & Consumer Affairs Department thuchhuah tarlan danin Consumer ten Bank Account No. leh Phone No. an thehluhna tur Form chu copy khat Rs.5/- aia toa hralh loh tur a ni a. V/C, Local Council leh Agency dang pawhin hei aia to a hralh phal a ni lo.
Consumer hnen aṭangin processing charge, Administrative charge leh thil dang lak phal a ni lo a, Form thehluttute hnenah pawisa lo phût an awm tih hriat a ni a, hei hi dan kalh tlat a ni a tun hnuah hetianga Consumer te hnenah dan lo anga pawisa lo chawitir leh an awm hriat a nih chuan nataka action lak a ni ang a ti.
Hmingthlak chungchangah Consumer te pawisa chawi tur zat dik tak chhutna (calculation chart_ an pe ngei ngei tur a ni a, dan bâka pawisa laksak ṭhinte chu an chungah action lak a ni ang a ti.
DBTL Scheme hi Mizoramin kumin aṭang khan a zawm ve chauh a, he scheme zawm aṭanga thla 3 chhung hi eirawngbawlna gas subsidy rate a lei phal a ni a, hetiang anih lai hian LPG Distributor ṭhenkhat ten a to-in Gas an hralh tih hriat a ni a, hetianga a manto a lo hralh tawh te hian subsidy rate aia a to-na zat hi Consumer te hnenah an pe let leh vek tur a ni a. Hetianga ti duh lo te chu dan anga action lak tur a ni tih Supply Department chuan a sawi bawk.