Aizawl khawpui-a CCTV dah Home Minister-in hawng

Aizawl khawpui him zawk nana Aizawl City Surveillance Project hnuaia Aizawl khawpui chhung hmun hrang hrang hmun 10-a thlalakna (CCTV) dah chu nimin khan Aizawl SP Conference Hall-ah Home Minister Pu R.Lalzirliana’n a hawng.
Home Minister Pu R. Lalzirliana chuan mipui venhimna kawnga dan leh thupek kengkawhtute tha tichak lehzual turin Aizawl City Surveillance Project hawn a lo ni ta chu a lawmawm takzet a ni, a ti a. Khawvel hmasawn zelah sualna hrang hrang lo pung chho mek lo do let a, chhui chhuak a, beilêt tur chuan dan leh thupek kengkawh-tute’n hmanraw thar leh ṭha an neih a pawimawh hle a.  Aizawl khawpui chhung a ralmuan lehzual theihna tur leh misual zawn chhuahna kawnga nasa taka ṭanpui thei turin Aizawl City Surveillance Project a taka hman theih a lo ni ta chu a lawmawm hle a ni, a ti.

Kum 2012 March thla khan Home Minister hovin sawrkar mipawimawh ṭhukawmte’n Aizawl City Surveillance Project duangchhuak a kalpui dan tur an ngaihtuah a,  DPR siam niin sawrkar laipui Ministry of Home Affairs-ah thehluh a ni. Ministry of Home Affairs chuan lo pawmin 30.3.2013 khan he project atan hian cheng vbc. 12.65 a ruahman a. A thawhkhatna atan cheng nuai 395.5 sanction nghalin hna thawh ṭan nghal a ni a, tunah hian hman theihin zawh fel a lo ni ta a ni. Modernization of State Police Force (MPF) hnuaia Union Home Minister Discretionary Fund aṭangin sum hi hmuh a ni a, he project pumpui atana sum ruahman hi kum kalta khan a bi kimin dawn fel a ni tawh nghe nghe. MPF Scheme hnuaiah hian State sawrkar chu 10%  tum ve ṭhin tur a tih a nih laiin Aizawl City Surveillance Project atan bika sum ruahman hi chu sawrkar laipui atangin za ah za hmuh a ni.

He Project hi Phase-3 a thawh turin ruahmanna siam a ni a, Phase–I hnuaiah hian Aizawl khawpui chhung hmun pawimawh hrang hrang 10 tuam a ni a, heng hmunte hi SP (Aizawl) Office Control Room aṭang hian engtik lai pawhin thlithlai reng tur a ni. Khatla Assam Rifle Junction aṭangin hmun 10 –  Khatla Assam Rifle Junction, Tennis Court junction, Raj Bhavan South Gate, Treasury Square, New Secretariat Complex, AOC, Aizawl Temple, Zodin Square, Canteen kual leh Bazar Bungkawn-ah camera hrang hrang 56 dah a ni a, heng camera thlalakte hi thla khat daih dahkhawlna tur (server) bun fel nghal a ni bawk. A thawh hnihna ṭan leh thuai tum niin hmun pawimawh 7-ah camera 35 bun leh tum mek a ni.

Hawnna inkhawm hi Home Department Addl.Secretary Pu Lalbiakzama’n a kaihruai a, DGP Mizoram Pu Dharmendra Kumar chuan thu a sawi a. Technical report hi KSJ Dynamics Security Pvt.Ltd. neitu Col.(Rtd) Karandeep Singh hnen atangin ngaithlak a ni bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram