Zoram Nationalist party (ZNP) chuan Kolasib leh a chhehvela Sangha Dil neitu chhungkaw ṭhahnemtak tana Sangha chi sem tum mek chu a dawngtu tur ten dawn tlak loha an ngaih avangin an la duh lo niin nimin khan thuchhuah siamin an sawi a, he Sangha chi supply tu hi ‘LN Kima Nursery Farm’ neitu a ni, an ti.
An thuchhuaha an tarlan danin, nimin khan Kolasib leh a chhehvela Sangha dil nei mi engemawzat chuan hriattirna an dawn angin, Bairabi kawng ‘O’ point-ah Sangha chi sem dawng turin zing dar 10 vel atangin an kalkhawm a. Nilenga an nghah hnuah tlai lam dar 4 vel ah Sangha chi hi a thleng a. Amaherawhchu Sangha chi hi a tet em avangin Sangha dil neitute hian damkhawchhuak zo turah an ngai lova, an dawng duh lo a ni.
Mizoram sawrkar, Fisheries Department chuan Sangha chi supply tura a tihah Sangha chi a zira Sangha sei zawng tur chu tun ṭuma Sangha chi supply hian a tlin lo hle a ni, an ti a.
Hetiang thil hi kumdangah pawh a lo thleng fo tawh ṭhin a, Sangha te chi, kutzung tiat vel bak ṭhang thei lo ‘Moka’ an tih te pawh an lo sem tawh ṭhin tih sawiin, Sangha dil hmanga eiz-awng chhungkaw ṭhahnem tak tih beidawn anni leh ta a ni an ti.