Auditorium sak mek dawlna tur lungrem chim leh

Inrinni zan khan Serchhip Auditorium sak mek dawlna tura a thlanga lungrem chu a chim leh a, hemi chungchang-ah hian Sub-Hqrs. YMA Serchhip Vigilance & Monitoring Committee chuan an lung-awi lo takzet tawh tih an sawi.
Helai lungrem hi an zo fel dawn tawh tihah nikum hmasa 2013 khan a lo chim rup tawp a, a kum leh, nikum khan RCC hmanga siam leh a niin chu pawh chu nikum fur lai khan a chim leh rup mai bawk a, a ṭum thum nan Inrinni zan ruahsur lai khan a sir ṭhenkhat lungrem chu a chim leh ta a ni.

He lungrem hi a khi deuh a awm avangin Inrinni khan Sub-Hqrs. YMA Serchhip Vigilance & Monitoring Committee chuan an lo tlawh tawh a, an hlauhthawn ang ngeiin a khikna hmunah hian a ṭhen a zar a chim ta nge nge a ni.

Nimin zingkar khan Sub-Hqrs. YMA Serchhip Vigilance & Monitoring Committee hruaitu te chuan lungrem chim hi tlawhin a hmunah an enfiah a, Contractor Pu V.Zosangliana chu kovin a rem ṭhat lehdan tur te an sawiho nghal a. Helai hmuna Auditorium sak mek leh lungrem hna hi NBCC hnuaiah Sub-Contract in Agni Shanti Company ten an thawk a, Agni Shanti Company hnuaiah hian Pu V.Zosangliana hian Mini Sub-Contract-in a thawk veleh a ni. Lungrem a chim hnu leh he thu ziahlai thleng hi chuan NBCC a Serchhip Bialtu RK Singh leh Engineer Mithun te chu Ser-chhip ah an awm lova, Contrac-tor pawhin hmalakdan thiam har a ti hle niin kan palai a hrilh.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram