Inrinni chawhma dar 11 aṭang khan Serchhip Bazar hnuaiah a hmasaber atan Zu Dawr hawn ṭan a ni.
Inrinnia zu dawr hawn ṭan aṭang hian Zu leina Permit neiten zu an lei nghal a, Excise & Narcotic Department, Serchhip-a thawktute chuan zu dawr aṭanga zu hralhchhuah a nih chhung hian Zu dawr bulah hian an duty reng a ni.
Zu zawrh te hi zu leina Permit neite chauhin an lei thei a, Thla 1 ah Card 1 tan Rum/Whisky 6 bottles leh Beer 10 bottles chiah an lei thei dawn a ni.
Inrinnia Bazarhnuai, Ser-chhip-a Zu Dawr hawng hmasa bertu hi Lalmuankima S/o F.Lalthlamuana a ni a. Zu Dawr atan hian anmahni In, Serchhip Bazar hnuaia mi an hmang nghal a ni.
An veng chhunga zu dawr hawn chungchangah South Kawnpui Branch YMA chuan thuchhuah siamin an Branch huam chhungah ualau taka zu in leh zu bur tihlan an remti lo tih an sawi an an area huam chhungah buaina reng reng siam rem an tih lo a, Dan anga zuar pawhin sawrkar phut ang thlapa an zawrh an duh thu an sawi a, an area-ah an area mi ni lo tan zu dawr hawn an phal lo tih an sawi a, an duhdan zawmlo an awm a nih chuan action na taka lak a nih tur thu an sawi bawk.
Tunah hian Serchhip Distrcit chhungah Zu lei phalna Permit nei hi mi 1340 chuang an awm mek a, hetihlai hian Excise & Narcotic Department lamte pawhin theihtawp chhuahin MLPC Act hnuaia Dan bawhchhiate hremna tur leh Zu vanga harsatna awm thei venhimna kawngah hmalakna kalpui chho ve nghalin, Zu Dawrah hian Excise Police 2 duty an dah reng ṭhin dawn a, Breathe Analyser hmangin puipunna hmun leh khawlai velah an duty reng dawn bawk a ni.