Mizo Zirlai Pawl, MZP Executive meeting an pawl President Lalhmachhuana kaihruaia nimina ṭhukhawm chuan, Mizorama lo cheng tawh thin Bru te chu harsatna dang siam lova Mizoram chhunga lo lut vek turin a duh tak zet tih an sawi.
Sawrkarin anmahni duhthu ngeia Mizoram chhuahsan tu Brute la let tura ruahmanna a siam chu tha an ti tih sawiin, MZP chuan anmahni duhthu ngeia Mizoram chhuahsan tute laklet turah hian Mizorama lo cheng tawh kum 1995 Electoral Roll-a chuang te leh an thlah te dik tak laklet an nih theih nan fimkhur taka hma la tur leh endik hna thawk turin sorkar official te chu a ngen a ni.
Meeting chuan Mizoram chhunga hnamdang dan lova sumdawngte dapchhuah a, a tul anga hmalak ni rawh se”, ti a alo rel tawh angin Mizoram chhunga dan lova hnamdang sumdawngte leh Mizo hming hawh a sumdawngte dapchhuah chungchangah hian sorkar thuneitute nen thawhho tha a ti a. sorkarin tun thla ral hmaa hma a la lo a nih chuan MZP chuan hnamdang dan lova sumdawng dapchhuah hna chu nasa lehzuala neih ni se an ti a ni.
Meeting chuan Mizo zirlaiten English leh Hindi tawng an nal theihna tura ruahmanna siam turin sorkar a ngen a, tun session atanga school tan hun darkar khata sawn hma chu tangkai zawka zirlaiten an chhawr theihna turin school ban hnuah darkar khat school tinin Spoken English leh Hindi-ah te Free Tuition pe turin School Education Department lam thuneitute chu ruahmanna siam turin a ngen tih an sawi a ni.