Nimin zing khan Manipur-a Chandel District-ah helho-in Sipai Convoy an lambunnaah sipai 20-in nunna an chân a, hei hi kum 1999-a Kargil War hnu-a vawi khata India sipai te thih tamna ber a ni a, mi 20 an thih bakah hian hliam 16 awmin, an zinga 3 te chu an dinhmun a ṭhalo hle a ni.
Central Security Agency te sawi dan chuan sipai te lambun-naah hian Naga hel pawl NSCN(K) leh United National Liberation Front of Manipur (UNLF) te inkawp thil tih a nih an rin thu an sawi a, heng sipai te hi 6 Dogra Infantry Regiment te niin, Moltuk valley aṭanga chhuak an ni a, Paralong leh Charong khaw inkarah an lo lambun a, an lambunna hmun hi Imphal aṭanga km 118 vela hla a ni a, helho hi mi 50 vel an ni a, ralthuamah hian silai pangngai bakah Rocket Propelled Grenade (RPG) launcher pawh an hmang a, bomb siamchawp pawh an hmang bawk a ni.
Silai hmanga an beih zawh hian helho hian Khukri (Gurkha chem) hmangin sipai te hi an bei zui a, an lirthei te pawh an hâlsak bawk a, he thil thlen dan hi chhui zui turin National Investigating Agency (NIA) kutah hlan a nih rin a ni.