Kumkhat chhung (April, 2014 – March, 2015) chhung khan Mizoramah nausen kum khat hnuailam 822 an thu a, hemi hun chhung vek hian nu, nau chunga thi 21 an awm bawk.
Ni 2 chhung awh tur, Health & FW Department hnuaia Reproductive & Child Health Programe (RCH) leh National Health Mission ten kum 2014 -15 chhunga an hnathawh thlirletna (Review Meeting) leh tun kumthara an hmalak dan tur sawihona chu Health Directorate Conference Hall, Dinthar-ah nimn khan an nei ṭan a, hetah hian nausen leh nau chunga thihna -IMR leh MMR- chungchang sawiho a ni a, tunah hian India ram pumpui IMR chu 40 a nih laiin Mizoram bik chu 35 a ni a, hemi awmzia chu kum khat chhungin nausen piang 1000 zelah nausen kum khat hnuailam 35 zel an thi tihna a ni. IMR sânna state Assam leh MP te IMR chu 54 nih laiin a hniamna ber chu Goa a ni a, an IMR zat hi 9 chauh a ni tih tarlan a ni.
Mizoramah IMR tihniam tura harsatna lian ber pakhat ni a lang chu nausen enkawldan thiam tawk loh vang te, an hriselna tura inchhungkhur tihfai leh Environmental Hygiene lama hniam vang te, natna thihpui mai theih hriat tawk loh vanga Doctor-te pan vat nachang hriat tawk loh vang te a ni an ti a, IMR tihniam tur hian hriselna lama thawktu mai an tawk lova, nu leh pa, chhungkua hrisel nih a ngai a, hriselna lam thleng hrethiam tur khawpa hriatna zau nu leh pa nih te, hriselna lama thawktu te nena thawhhona ṭha neih a ngaih thu te tarlan a ni a.
Meeting-ah hian Nausen thi tamna Saiha District-ah chuan nausen damlo enkawlna (SNCU) leh Lawngtlai ah pawh SNCU hawn a ni tawh tih sawilan a ni a, nu, nau chunga thihna leh nausen thihna a tlem theihna tura mipuite zirtirna (Awareness Campaign) District tinah neih neih mek a ni tih sawilan a nih bakah mipuite awareness tam zawk pek dan tur leh thawhhona ṭha zawk neih dan tur lam chu ngaihtuah ber a ni.