Champhai District-a loneitute tan kawng hrang hrangin ṭanpuina ruahman mek

Nikum lamah ruahtui tlak tlêm avanga Champhai District chhunga loneituten buhbal an thar tlêm vangin Champhai District Agriculture Department chuan loneitute hmakhaw ngaiin kawng hrang hranga ṭanpuina a ruahman mek.
Champhai District chhunga loneitute pualin kuminah leilehna khawl, Power tiller 99 man tlâwm zawka a leitir dawn bakah luipui tui pump-na tur Pump Set 188 man tlâwmin a leitir dawn bawk.

Champhai DAO Pu Lalthanzuala chuan luipui kam leilet a Buh leh bal chingtute tan bik a ruahmanna hi siam a nih thu a sawi a, nikumah mamawh huna ruahtui a tlak tlem vangin buhbal ching thei lova loneitu tam tak an awm vangin an harsatna sutkian anih theih nan luipui tui lakna atan heng Pump Set te hi ruahman anih thu a sawi bawk a, nikumah leilehna hmanrua ber Lawi chu hrileng vanga a thih deuh vek bawk avangin Leilehna khawl hi ruahman a ni a ti.

Nikum aiin kumin ah ruah-tui a tlak chhiat zawk a hlauh thu sawiin, DAO chuan kumin hi Champhai District-ah June thla chhunga ruahtui dawn chhiat ber a nih theih thu leh loneitute mamawh ber hun June thla bikah nimin thleng in ruah 19.89mm chauh a tlak thu a sawi a. Champhai District a loneitute chu buhchi phun tur kui ṭiak rihlo tura loneitute chu chahin, DAO chuan eng buh chi pawh ni 25 aia upa lova phun vek turin loneitute a chah a ni.

Loneitute hi Rastrya Krishi Vikas Yajona (RKVY) Scheme hnuaiah leilehna khawl company hrang hrang siam leina atan sawrkarin Rs.75,000/- a tumsak dawn a. He Scheme hnuaiah hian loneitu Leilehna khawl mamawh mi 300 zet diltu zingah mi 99 hnenah pek a ni thung a. All Mizoram Farmers’ Union (AMFU) pawhin kumin hi buhbal thar kumah a puan bawk vangin nasa tak tan lak a tum ni a sawi a ni.

National Food Security Mission (NFSM) leh RKVY Scheme hnuaiah Champhai District loneitute tan tui pump-na khawl,Khawnvartui, Diesel leh Electric Current hmang chi hrang hrang leina atan sorkarin cheng sing 1a tumsak dawn bakah Nylon tui pipe mm 75 lian, Meter 5 a sei chu tlawn khat a man chanve a lei theih turin a ruahman sak bawk.

Agriculture Department chuan Champhai District chhunga leilet zau hrang hranga chin turin phairam buhchi tha a sem kual mek bakah thlaichi venna hlo a sem chhuak nghal bawk a. Chinai thi leh Chemical Fertilizer a pek chhuah bakah loneituten harsatna an neih apiang District Agriculture Department hotute hnenah hriattir thin turin a chah bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram