Mizorama Green Mizoram Day hman hlawhtlin dan district hrang hrangte endiknaah Saiha district chuan hlawhtlin pui berin, 81.21% an hlawhtlinpui a, hlawhtlinpuillo ber Champhai district-in 14.68% a hlawhtlinpui a ni.
Green Mizoram Day chu nimin khan Mizoram pumah hman a ni a, a hmanna lian ber Aizawl District chuan Hmuifang Tourist Complex, Hmuifangah hmangin, Mizoram Governor Lt.Gen (Rtd) Nirbhay Sharma chu khuallian a ni a. Chief Minister Pu Lal Thanhawla chu Khualzahawm a ni. Kumin Green Mizoram Day thupui chu “I dam khawchhuah nan thing phun rawh’ tih thlan a ni.
Governor chuan Mizoram-in thing tiak phun beihpui hun rei tawh taka atanga alo kalpui tawhna hi hmathlir thui tak a neih vang a ni tiin, hei hi Mizo-ram tan mai nilo rampum tana hlawkna a ni a ti. Thing tiak kan phunte hi an damkhawchhuah ngeina turin uluk taka vil leh enkawl chhoh a tul hle a, district dangah pawh an dam chhoh ngeina turin thuneitute pawhin hma an lak a tha a ni a ti.
Khualzahawm Chief Minister chuan thing ṭiak phun hi chhuan lo kal leh zel turte tana chenna nuam leh boruak thianghlim kan siam sakna a nih piah lamah, tunlai khawvelin a buaipui ber sik leh sa lo dang-lam leh boruak lum chho zel siam ṭhatna pawimawh tak a ni a ti. An puitlin a, an damkhaw-chhuahna turin a ven him leh enkawlzui an mamawh tih kan hriat a tha a ti a, thing phun te enkawlzui hi kan zavai mawh a ni a ti.
Green Mizoram Day denchhen hian kangmei vênna tiṭha zual lawmman, Fire Prevention Awards 2014-2015 chhunga district leh khua tana buatsaih chu Khuallian hian a sem a, District-a ti ṭha ber Lawngtlai district a ni a, pahnihna chu Kolasib ditrict niin, pathumna chu Saiha a ni. Hengte bakah hian Aizawl district chhunga khua tiṭha ber pakhatna lawmman hi Sailutar-in a dawng a. Pahnihna chu Tlungvel niin, pathumna chu Phulpui khuain a dawng a ni.
Nimina Aizawla thing ṭiak phun zât hi a vaiin 390 a ni a, Hmuifang Tourist Complex bakah Lal Thanhawla Parks-ah te phun an ni a, Khuallian leh Khualzahawmte bakah an nupuite, Minister te, Chief Secretary leh senior officials ten an phun a ni. Governor hian Raj Bhawan kawt tualah thing tiak a phun bawk a ni.