Nimin khan Chief Minister Pu Lal Thanhawla hovin Home Minister Pu R.Lalzirliana, Finance Minister Pu Lalsawta, UD&PA Minister Pu Zodintluanga, NIB Chairman Pu JH Roṭhuama, NIB Vice Chairman Pu PL Thanga te bakah Champhai DC leh mipawimawh dang te chu Kelkang khaw chhawmdawlna tur leh Harhna chhimtu mipui te awlsamna tura hmalak nghal dan tur ngaihtuahin an ṭhukhawm.
Harhna avanga chhimtu mipui ṭhahnem takin hun rei tak Kelkang khua hi an chamchilh reng avangin eizawnna leh kawng hrang hranga mipui pun khawmnain harsatna a thlen mek te chu nimina ṭhukhawm chuan an sawi ho a, kuminah thlawhhma la mumal hman pawh an awm loh avangin khaw mipui te tana eizawnna tur ngaihtuahsak chu thil pawimawh hmasaah ngaiin Bank-a NLUP sum pung aṭangin Kelkang khaw mipui te tan vawk leh ar vulh bakah petty trade hmanga eizawnna ngaihtuahsak nise, tih a ni a. Eng trade mah thawk theilo te pawh chhumchia scheme aṭanga ṭanpui tura tih a ni bawk.
Kelkang khaw mipui te tana eizawnna bakah hian mipui punkhawmnain mamawh leh harsatna hrang hrang a thlen te a rang thei ang bera sutkianna tur pawh ngaihtuah ho a ni a, hnianghnar zawka tui pekna tur te, inthiarna mumal zawk sakna tur te, bawlhhlawh thenfaina tur te, damlo te tana first aid damdawi leh thawktu duty indahna tur te, power supply leh school naupang zirna mumal taka kalpuina tur ten ruahmanna siam nghal a ni a. Heng ruahmanna te hi Champhai DC kaihhruaina hnuaiah bawhzui leh thawhho tur a tih a ni.
Chief Minister hova ṭhukhawm chuan lirthei chetsual theihna lakah mipui kan him tlan theih nan Kelkang pan tur leh haw lam pawh fimkhur tura ngenin motor neitu leh khalhtu te chu tlân chak lo turin a ngen nghal bawk a ni.