Coast Guard thlawhna chin hriat lohin awm

Pilot 2 leh Navigator 1 chuanna, Indian Coast Guard thlawhna, Dornier chu Thawhṭanni zan aṭang khan a chin hriat lohin a awm.
Dornier-ah hian Dty Commandment Vidyasagar (pilot), Commandment MK Soni (co-pilot) leh Deputy Commandment Subhash Suresh (navigator) te an chuang a, he thlawhna hi Thawhṭanni tlai dar 5:30 khan Chennai Airport aṭangin a thlawk chhuak a, zan dar 10 vel khan biak pawh theih a ni ta lo a ni.

He thlawhna, CG-791 hi kum 2014-a an neih thar niin, Indian Coast guard thlawhna neih hnuhnun ber a ni a, Thawhṭanni zan dar 10 kha chuan Trichy airport radar-ah la hmuh a ni a, hemi hnu hian a chin hriat zui a ni ta lo a ni.

He thlawhna bo zawn hna hi Navy leh Coast Guard ten ngawrh takin an bei zui nghal a, Coast Guard lawng 5, Indian Navy lawng 4, Indian Coast Guard leh Indian Navy thlawhna hmangin tuipui leh khaw-mualah zawn a ni a, Defence Ministry thupuang-tu Sitanshu kar chuan, “Dornier thlawhna bo hi Indian Coast Guard-ina thlawhna an neih hnuhnun ber, 2014-a mi a ni a, experience nei ṭha tak takina an thlawhpui a ni,” tiin a sawi a, “Ngawrh taka zawn hna leh chhanchhuah hna hi khawmual leh tuipuiah neih a ni,” tiin a sawi.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram