Delhi Law Minister Jitender Singh Tomar chu law degree lem neia puh a ni a, mi bum, mi bum nana thil lem siam leh, degree lem hmanga hna hmua puhin vangin Delhi Police ten an man.
Nizan hmasa khan Delhi Police te chuan First Information Report ziaklutin Hauz Khas Police Station-ah thuzawhfiah turin an la a, Bar Council of Delhi -in law degree lem neia puha criminal complaint an thehlut a, Bar Council hian Tomas-a licence hi an suspend sak tawh bawk a ni.
Bihar-a awm Tilka Manjhi Bhagalpur University chuan Delhi High Court-ah Tomar-a law degree chu siamchawp a nih thu an hrilh tawh a, he University hian Tomar law degree hi an record-ah a awm lo tih an sawi a, a certificate-a serial number langah chuan midang hming a awm bakah stream dang daih a nih thu an sawi a ni.
BJP leh Congress chuan hemi chungchang avang hian April thla aṭang khan Singh-a hi bâng turin an lo phût tawh a, Bar Council pawhin hemi chungchang hi chhui an lo phût tawh bawk a, he thil hi Delhi sawrkar leh Lieutenant Governor te inhmuh thiamlohna nghawng kal zel nia rin a ni.
Tomar chuan, “Police 30-40 vel Additional Commissioner of Police hovin ka Office-ah an lo kal a, thu zawh duh min neih thu an sawi a, Arrest Warrant hmuhtir ka ni lova, thil kimchang min hrilh lo bawk a, min tibuai a ni. Hei hi Politics thila phuba lakna a ni,” tiin a sawi.
AAP thupuangtu Sanjay Singh chuan, “Jitender Tomar thubuai hi High Scourt-ah a awm tawh a, engvanginnge an man? Pressure siam duh vang a ni ang em? Lieutenant Governor leh Modi sawrkar hian kan laka pressure pek an tum a ni. Keini chuan Corruption do hi kan chhunzawm zel ang,” tiin a sawi bawk.