Central YMA leh Central Young Chakma Association (CYCA) te chuan Bangladesh aṭanga ramdangmi dan kalha lo lutte dap chhuak tura sorkar hmalakna chu thlawpa sorkar thawhpui tlat an tum thu an sawi.
Central YMA leh Central YCA hruaitute hi Chawngte-ah inhmukhawmin he resolution hi an pawm a. Resolution-ah hian Central YMA general secretary leh Central YCA Vice president te’n an hming an ziah hnan a. Central YMA general secretary Pu Vanlalruata chuan sorkar laipui leh state sorkarin Bangladesh aṭanga dan kalha ramdangmi lo lut te dap chhuaka thawn kir tura Task Force a din chu an hna thawhna kawnga thawhpui an tum thu pawl pahnihte hian ziakin an dah a ni a ti.
Hetiang a nih avang hian Chakma ramdangmi chhiarpui nei tura Central YMA-in ruahmanna a lo siam tawh chu kalpui rih lovin Task Force hmalakna hi ngaihchan rih an tum a. Sorkar hmalak dan an duhtawk loh erawh chuan la ngaihtuah ṭhat leh tur a nih thu Central YMA hruaitute chuan an sawi a, chutih lai mek pawh chuan Bangladesh ramri-a thil kal vel chu ngun takin an thlithlai reng dawn niin an sawi a ni.
Mizoram sorkar Home department chuan Bangladesh aṭanga ramdangmi dan kalha lo lut leh khua leh tui chin bithliahna atan Assam inremna ang zul zuiin kum 1971 March ni 14 chu hman ve ni se tiin rawtna an siam a. Union Minister of State for Home Pu Kiren Rijiju hnenah Thawhlehni zan khan memorandum theh lutin kum 1971 March ni 14 hnu-a Bangladesh aṭanga Mizorama lo lutte chu ramdangmi-a puanga Bangladesh-a thawn kir an nih theihna tura thutlukna siam turin ngenna an lo siam a ni.