Mizo nula 2, Nuzawni Kanhmun inti leh Lalrinfeli Seling inti te chu tunhnai khan Netaji Subash Chandra Bose International Airport Kolkata ah man an ni a, passport lem hmanga Singapore pan tuma thubuai siam sak ve ve niin tunah hian Barrackpore Jail ah tan tir mek an ni.
Kolkata Mizo Students zinga mi Tv Lalruatfela Ralte Gen. Secy. leh Joshua Ralte ten thahnem ngaihin Mizo nula 2 te hi an buaipui mek a, Lalrinfeli Seling inti hi kar kalta May 28, 2015 khan Kolkata atanga Singapore pan a tum laiin Airport chhungah thuneituten an man a, a passport a thlalak nen a in mil love tiin thu buai rip tak an siam sak a, Barrackpore Jail lamah thawn nghal a ni.
Nuzawni Kanhmun khua nia inchhal ve thung hi chu a hma kar liam ta a passport lam fel lohna bawka man lo ni tawhin Barrackpore jail ah bawk tan tir a ni a, Passport lem siamsak tute hi Global Talents Agency Aizawl niin thulakna chuan a tarlang.
Heng Mizo nula 2 man tak te hi an case hi rin ai taka a khrih avangin bail chhuah theih mai an inrin loh thu an mahni buaipuitu Mizo zirlai zinga mi Tv Lalruatfela Ralte chuan a sawi a. Hetih lai hian Kolkata Mizo Students te leh Kolkata Mizo Welfare Association hruaitute chuan hetianga passport chiangkuang lo leh a lem hmanga mahni hnam pui, thil chinchang hre lo zawkte sum duh luat tuk avanga bum duh a, rawn thawn thla fo thin an awm chu hriatthiam har an tih thu leh an duh loh thu an sawi a ni.
Kolkata Mizo te hian theihtawp chhuahin, tha leh zung sengin hetianga buaina tawk te hi mahni hnam pui an nih vangin an lo buaipui a ngai thin a, chuvang chuan tunhnu zelah hetiang thil duhawm lo hi tih tawh lo turin hetiang lam buaipui thin te chu an duh thu an sawi a ni.