Governor-in Lawngtlai leh Saiha a tlawh

Mizoram Governor Pu Nirbhay Sharma PVSM, UYSM, AVSM, VSM (Retd) chuan nimin khan Lawngtlai leh Saiha a tlawh a,
Governor hian Saiha tlawh hmasain, DC Conference Hall kawtah zahna chibai a chhan hnuah Mizoram State Thing “Herhse” ṭiak a phun nghal a ni.

Hemi zawh hian Conference Hall-ah Mizoram Sawrkar hnuaia Office hotute meeting a neih pui nghal a. Governor chuan Sipai-ah kum 40 a ṭan chhung khan Border Area-a cheng te leh tlangrama Tribal cheng te bulah a khawsa nasa a, Tlangrama cheng te chu an nun a thianghlim a, an nihna ang anga lang ṭhin, hnam rinawm tak an ni tih a hmu niin a sawi a, Saiha District aṭangin zirna-ah te, Sport-ah te leh thil dang dangah ṭhalai ten hlawhtlinna an lo chang tawh ṭhin a, chutiangin thalaite hlawhtlinna chanchin dang chu a ngaiven reng dawn a ni, a ti bawk.

Governor hian CEM Conference Hall-ah MADC hruai-tute a kawm a, MADC hotute chuan Sixth Schedule Amendment leh District Sainik Board din chungchangah te Governor ṭanpuina chu ngenin Memo-randum an thehlut nghal a ni.

Hemi hnu hian Lawngtlai pan leh nghalin DC Office tualah thing ṭiak a phun a, Lawngtlai-ah darkar 1 leh minute 55 a awmchhungin state sawrkar hotu te a kawm a, District chhunga Hriselna, zirna leh hmasawnna hrang hrang te an sawiho a, State sawrkar hotute nen an inkawm zawh hian Lai Autonomous District Council leh Chakma Autonomous District Council-a MDC te kâwm lehin District Council dinhmun te an sawiho bakah District Council pahnihte hian an mamawh te Governor hnen ah hian an lo thlen a ni.

Governor chuan Lawng-tlai District chu Myanmar leh Bangladesh ram nen an inri avangin ramdang mi dan lova lut ru an tam thei a, Assam Rifle, Border Security Force leh State Police te chu inpawh-tlang taka hna thawkho tur an ni a ti a, Lawngtlai District chhunga ziak leh chhiar thiam an pun theih nan te, nau piang thi an tlem theih nante, hriselna kawnga chak zawka hmalakna a awm theih nante uar zawka Awareness Campaign neih ṭul a tih thu sawiin, kohhran leh tlawmngai pawl te nasa zawka thawhhopui a ṭul a ni a ti.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram