India Danpui Article 174 Clause (1) in thuneihna a pek angin Mizoram Governor Lt.Gen. Nirbhay Sharma PVSM, UYSM, AVSM, VSM (Retd) chuan 7th Mizoram State Legislative Assembly Session vawi 6-na chu July 7, 2015 zing dar 10:30 a neih tan turin a ko. Tun thla chhung hian session neih dan tur chungchang ngaihtuahin Bussiness Advisory Committee chu Speaker Pu Hiphei-a hovin an thukhawm dawn niin Assembly Secretariat atanga thudawn a ni a, session neih tura budget pharh a nih leh nih loh tur pawh hriat a la ni lo a ni.
Hetihlai hian, Finance Dept Secy Pu F Vanlalruata chuan session neih turah hian Mizoram state budget pumpui chu pharh hman ngei an tum tih a sawi a, hetihlai hian central sorkar chuan kum kal mek 2015-2016 chhunga hman tur Mizoram annual plan a la siam lova, hei vang hian budget pumpui pharh theih a ni ngei ang em tih a la chiang thei rih lo a ni.
