Kolasib District Vigilance & Monitoring Committee thukhawm

Kolasib District huam chhunga sawrkar laipui bultuma thingtlanga hma-sawnna scheme leh programme hrang hrang kalpui mekte ennawn leh thlithlaia, an thlen tawh chin leh harsatna an tawhte sawihoin nimin khan Kolasib District Vigilance & Monitoring Committee chu an chairman Rajya Sabha MP Pu Ronald Sapa Tlau hovin Kolasib DC Conference Hall-ah an ṭhukhawm.
Pu Ronald Sapa chuan Kolasib District chu ramri hrula awm leh Mizoram kawtchhuah a nih avangin a dinhmun a pawimawh a ni, a ti a, Mipui thleng phak hmasawnna puanzar chu tun aia uar leh zual nise, hmasawnna hnathawhna kawngah tlawmngai pawlte an pawimawh a, an thawh hlawk bawk a, kawng tam takah chuan a hmahruaitu niin an dinhmun a pawimawh a ni, a ti.

Nimina Meeting-ah hian MGNREGS, IAY, IWMP, PMGSY leh scheme dang te hnuaia hnathawh leh hmalak dan, sum hmuh an hman dan te thlir hovin harsatna thenkhatte chu a kalpuitu Department aiawhte leh he Committee Member ten tarlangin chung harsatna te chu an sawiho a ni.

Meeting-ah hian hriselna kawnga Kolasib dinhmun chu Kolasib CMO chuan a tarlang a, kum 2014-2015 khan raihcheha thi MMR rate mi 1000 zelah 2.15 leh nausen thi, IMR rate mi 1000 zelah 35.5 an ni a ti a. TB vei hmuhchhuah thar mi 79 an awm a, 2014 chhung khan mi 3 malaria avangin an thi tih a sawi a ni.

RMSA Kolasib in an tuam sikul 24 ah kum kalta chhunga an hmalakna hrang hrang an tarlang a. SSA hnuaia zirlai nuapang 10373 chu uniform pek niin naupang 14234 te chu a thlawna zirlai bu pek an ni a. Mid Day Meal hnuaiah Upper Primary School 85 ah zirlai 5896 leh Primary School 102 a zirlai 8519 te chu chhun chaw pek an ni a, hemi atan hian Cook 389 rawih mek an ni. Hei bakah hian JNNURM hnuaia IHSDP programmeah chhungkaw harsa zual tan chenna in 300, cheng nuai 704.02 senga sak zawh tawh a ni a, heng chhena in te hi an luah vek tawh a ni.

PHE Department in National Rural Drinking Water Programme hnuaiah khaw 23 a tui lakna tur tihchangtlun an tum tih tarlan a ni a. NLCPR hnuaiah Bilkhawthlir Water Supply Scheme leh Bairabi Water Supply Scheme te chu zawhfel tawh niin hnu reilo tea hawn beisei a ni a. Hortoki Water Supply Scheme chu zawhfel tawh niin hei hi ONGC in Corporate Social Responsibility hnuaia an thawh a ni, an ti.

He meeting ah hian District atanga MLA pathum – Parliamentary Secretary Pu Hmingdailova Khiangte, Parliamentary Secretary Pu K. Lalrinthanga leh Pu P. C. Zoram Sangliana, MIFCO Chairman te an tel a.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram