Deputy Passport Officer, Passport Seva Ken-dra, Aizawl chuan mipuite tan hriatirna chhuahin, ni 26 May 2015 aṭang khan Passport Seva Kendra, Aizawl-ah ‘Online Passport Services’ hawn a ni tawh tih a sawi a, Mizorama aṭanga he Online Service hmanga passport dil duhte tan hriat tur pawimawh ṭhenkhat a sawilang bawk.
Mipuite hriattirna a chhuahah chuan Passport thar emaw Renewal dil duhte chuan www.passportindia.gov.in ah online application an thawn tur a ni, a ti a, Application fee pawh online-a pek tur a ni a. He website hi user-friendly taka siam a nih avangin awlsam taka mahni in-register theih a ni a. Zawhna nei pawhin he website kaltlangin chhanna a hmu zel thei ang, a ti bawk.
He online system hian nasa takin passport dil chhung a titawi dawn a, Passport thar siam dilte tan ni 30 chhungin peihfel a ni ang a, Renewal ti duhte tan ni 15 chhunga tihfel-sak a ni bawk ang. Hetiang-a a ran theihna chhan chu police verification pawh online-a tih a ni tawh dawn a, a hmaa ni 15 vel nghah ngai ṭhin kha ni 7 chhung leka tihfel theih tawh beisei a ni a. District hla zawk Lawngtlai leh Saiha aṭang pawhin awlsawm taka dil theih tawh dawn a ni, a ti.
Passport diltu chuan ama hming ngeia application thehlut tur a ni a, application fee pawh amah ngeiin a pe tur a ni a, aiawh a hmang thei lovang, a ti bawk.