Zothlifim Logo
Loading ...

Mizoram Excise and Narcotics Department hnuaia Anti-Narcotics Squad te chuan nimin zing dar 9:45 khan Aizawl Edenthar Vengah Pseudo-ephedrine ṭhahnem tak an man.
Heng Pseudo-ephedrine an man takte hi a vaiin mûm 2,53,736 a ni a, Kg 23 leh gram 400 zeta rit a ni. Excise and Narcotics department hotute chuan Pseudo-ephedrine hi Silchar lam aṭanga rawn lak, khawchhak lama hralh an tum mek lai a nih thu an sawi a. Pseudo-ephedrine neitu nia puh – Lalbiakzuala (38) Tanhril Vengpui leh Lalliana (42) Edenthar nia inchhalte chu man nghal an ni. Anni bakah hian Pseudo-ephedrine zawrh kualna atana an hman Wagon R, Registration No MZ 01/G-7598 pawh hrensak an ni bawk. An zawrhna ang chuan a vaiin Rs.45,67,248/-  man hu a ni.

Excise department hotute sawi danin tunlai hian Pseudo-ephedrine man hi a to hle a, mum khat hi Rs.18/-a hralh an tum a; a neitute’n mum khatah Rs.16/- hauhin a zuar chhawngtute’n mum khatah Rs.2/- an hlep ve tura ruahman a ni. Pseudo-ephedrine neitu nia puh – Lalbiakzuala leh Lalliana te hi Narcotic Drugs and Psychotropic Substances Act,1985 hnuaiah thubuai siamsak nghal an ni.

Hetihlai hian Nilai zan khan Mizoram Police Special Narcotics Cell a thawkte chuan Aizawl-ah tunlaia dam-dawi hlauhawm tak Methamphetamine mum 14,000 an man a. Lalrinzuala (43) Aizawl Zarkawt leh Khawlhming-thanga (53), Tamu, Myanmar amite chu hemi hungchangah hian an man a. An Methamphetamine man hi cheng nuai
42 chuang man hu nia hriat a ni.