SERCHHIP: Serchhip District-a SSA Mission-a thuneitu sâng ber District Education Committee chu kum 2015-16 chhung atana a vawi 2-na turin nimin chhun dar 11 khan an Chairman Pi Juhi Mukherjee, Deputy
Commissioner & Chairman, DEC, Serchhip kaihhruaiin DC Office chamber-ah an ṭhukhawm.
Meeting-ah hian kum 2015-16 atana sawrkar laipui (Ministry of Human Resources Development) hnuaia Project Approval Board (PAB)-in SSA Mission, Serchhip District tana budget a ruahmansak dan thlir leh zirhona
bakah Swachh Bharat Swachh Vidyalaya hnuaia Toilet 111 sak mek hnathawh dan thlirhona neih a ni a. Thil dang pawimawh tak tak sawiho leh rel a ni bawk.
Meeting-a tarlan danin kum 2015-16 atan sawrkar laipui (Ministry of Human Resources Development) hnuaia Project Approval Board (PAB) -in SSA Mission, Serchhip District tan cheng nuai 1063.84 a ruahmansak thu
te, hna thawh tur ruahman zinga a lian ber – Swachh Bharat Swachh Vidyalaya hnuaia School Toilet pakhat sak nana cheng nuai 2.25 zel senna turah cheng nuai 247.25250 dawn tawh a nih thu leh he pawisa hmang hian
chak taka hna thawh chhhoh mek a nih thu te tarlan a ni a. District tana budget ruahmansak inhrilhfiahna hun hman a ni bawk a. He budget hmanga hmalak chhoh zel dan tur kimchang (Programme of Action) chu State
Project Office (SSA) kaihhruainaa la ruahman leh tur a ni ang.
Swachh Bharat Swachh Vidyalaya hnuaia toilet sak hna thawh mek dan thlirletna leh hmachhawpte report leh sawihona neih a ni bawk a. Khuain a zir loh avang leh inkalpawhna kawng ṭha lo avangin khaw ṭhenkhatah beisei
anga hna thawh chak theih a nih loh thu tarlan a ni a, hei vang hian hunbi tiam chhung (June, 2015 chhung) a zo hman lo tur sikul engemaw-zat an awm tih hriat a ni a. Heti chung hian hna pawtchhe chuang lova a hma thei
anga zo thei tura hma lak chhun-zawm nise tia rel a ni a. Tin, tluang taka leh ṭha taka toilet sak hna zawh a nih theih nana ruahmanna hrang hrangte pawh thlirho a, pawm a ni bawk.
Meeting-ah hian Mizoram chhunga elementary school zirnaa zirlai naupang (Class-III) ten an thiam tur ang an thiam leh thiam loh tehna survey SCERT, Mizoram in a buatsaih – State Learning Achievement Survey Report-in
a tarlan danin Serchhip District chhunga elementary education bikah tan lak thar a ngai hle nia a lan thu tarlan a ni bawk. Meeting-ah hian member-te an kal ṭha hle a ni.