Zothlifim Logo
Loading ...

Vawiin aṭanga Kaskau relief camp-a awm Bru hote laklet hna ṭan tura ruahman chu Mizoram mi an nih leh nih loh finfiah tura inlan an awm loh avangin ṭhulh a ni.
Home department Additional Secretary Pu Lalbiak-zama sawi danin Bru laklet chungchanga Road map palina ruahmanna siam ang chuan vawiin hi a taka Kaskau a awmte laklet leh hun tur a ni a. Mahse kar hmasa Thawh-lehni leh Ningani inkar chhunga Mizoram mi dik tak an nih leh nih loh enfiah tura relief camp-a ruahmanna siamah tumah an inlan tak loh avangin vawiin aṭanga laklet hna thawh chu ṭan a ni thei dawn ta lo a ni. Heti chung hian Road Map-a ruahmanna lo duan lawk tawh angin thil hi a tawp thlenga kalpui chhoh tum a ni a. Hemi hun chhung hian lo kir duh an awm phawt chuan sawrkarin a buaipui zel dawn a ni, a ti.

Hetihlai hian Bru laklet chungchanga Supreme Court-a thu awm mek chu thla leh July ni 10 khian ngaihtuah leh tur a ni a. Ministry of Home Affairs hotute bakah Mizoram leh Tripura sorkar aiawhte pawh court hmaa inlan tura ngaih an ni.